Լոռու մարզպետի աշխատակազմ

Լոռու մարզպետ Արամ Ղազարյանի շնորհավորական ուղերձը Թանգարանների միջազգային օրվա առթիվ 20.05.2024

Թանգարանների հարգելի՛ աշխատակիցներ, արվեստաբաննե՛ր ու պատմաբաննե՛ր, հնագետնե՛ր ու ազգագրագետնե՛ր, ջերմորեն շնորհավորում եմ ձեզ Թանգարանների միջազգային օրվա առթիվ: Թանգարանները յուրօրինակ կամուրջ են ժամանակների և մշակույթների միջև, նրանցում ոչ միայն արժեքներ են պահպանվում, այլև կատարվում է գիտական լուրջ աշխատանք, և այդ ամենը ձե՛ր շնորհիվ, թանգարանային գործի հարգելի՛ նվիրյալներ: Թանգարանները հայրենագիտության ու արվեստի ինքնատիպ կրթամշակութային օջախներ են, որտեղ համադրված են պատմությունն ու հիշողությունը, արվեստն ու արհեստը: Այս օրվա խորհուրդն ու ուղերձը նաև թանգարանների դերի վերարժևորումն է. այն, որ բացի արժեքավոր արվեստի նմուշներ ցուցադրելուց, նրանք նաև բացահայտում են տվյալ երկրի ինքնությունը, մշակութային առանձնահատկությունները և ակամա կամուրջ դառնում սերունդների միջև:

Լոռու մարզպետ Արամ Ղազարյանի շնորհավորական ուղերձը Ընտանիքի միջազգային օրվա առթիվ 15.05.2024

Սիրելի՛ հայրենակիցներ, լոռեցինե՛ր ջերմորեն շնորհավորում եմ Ընտանիքի միջազգային օրվա առթիվ: Ընտանիքը հայ ժողովրդի համար նույնպիսի բացարձակ արժեք է, ինչպես հայրենիքն ու պետությունը: Այն մեր հասարակության հիմնասյունն է, իսկ ամուր և բարեկեցիկ ընտանիքը՝ ուժեղ պետության գրավականը: Այն հայի համար սրբություն է, իր մեջ խտացնում է հավատարմություն, սեր, հարգանք ու համերաշխություն: Ամուր ընտանիքի հիմքի վրա է ձևավորվում և զարգանում քաղաքակիրթ հասարակությունը: Ի զուր չէ ասված՝ «Ազգերի զորությունը ընտանիքների մեջ է: Զորավոր է այն ազգը, որն ունի զորավոր ընտանիքներ, սիրով, միությամբ, առաքինի և հավատարիմ կենակցությամբ ապրող»:

Լոռու մարզպետ Արամ Ղազարյանի ցավակցական խոսքը Կարեն Բաղիշի Սարիբեկյանի մահվան կապակցությամբ 10.05.2024

Ցավով տեղեկացա Հայաստանի Հանրապետության ԱԺ նախկին պատգամավոր, Վանաձոր համայնքի ավագանու նախկին անդամ, Երկրապահ կամավորականների միության անդամ, մեր համաքաղաքացի Կարեն Բաղիշի Սարիբեկյանի մահվան մասին: Կարեն Սարիբեկյանը մասնակից է դարձել հայրենիքի պաշտպանության համար մղված մարտերին: Որպես ավագանու անդամ և ԱԺ պատգամավոր՝ նա աչքի է ընկել բազմաթիվ նախաձեռնություններով, իր ներդրումն ունեցել երկրի ու ծննդավայրի զարգացման գործում:

ՀՀ Լոռու մարզպետ Արամ Ղազարյանի շնորհավորական ուղերձը Երկրապահի օրվա կապակցությամբ 08.05.2024

Սիրելի երկրապահնե՛ր, հայրենակիցնե՛ր, լոռեցինե՛ր, Երկրապահի օրվա կապակցությամբ ջերմորեն շնորհավորում եմ բոլորին: Ավելի քան 30 տարի առաջ Երկրապահ կամավորականների շարժումը առաջինն իր վրա կրեց հայրենիքի սահմանների պաշտպանության, երկրի անվտանգության ապահովման ծանր պատասխանատվությունը՝ լուսավոր մի ջահ դառնալով հանուն Հայաստանի Հանրապետության անկախության ու մեր երկրի սահմանների անվտանգության համար մղված արդարացի պայքարի ճանապարհին։ Անհերքելի է Երկրապահ կամավորականների ներդրումը մեր երկրի անկախության ձեռքբերման և կայացման գործում: Երկրապահը եղել է բանակի հիմքն ու հիմնաքարը, իսկ բանակը մեր անվտանգության երաշխավորն է: Այժմ էլ այն չի դադարում լինել բանակի հենարանը:

Լոռու մարզպետ Արամ Ղազարյանի ուղերձը Հաղթանակի և խաղաղության օրվա առթիվ 08.05.2024

Հայրենական Մեծ պատերազմի սիրելի՛ վետերաններ, զինվորնե՛ր ու սպանե՛ր, հարգելի հայրենակիցնե՛ր, լոռեցինե՛ր, ջերմորեն շնորհավորում եմ Հայրենական մեծ պատերազմում տարած հաղթանակի 79-րդ տարեդարձի առթիվ: Հայ ժողովրդի զավակները մեծ ներդրում են ունեցել Հայրենական պատերազմում տարած հաղթանակի գործում՝ քաջաբար դրսևորելով իրենց ռազմի դաշտում և ապացուցելով իրենց մեծ նվիրվածությունը հայրենի հողին ու ազատության գաղափարին: Հազարավոր հայորդիներ իրենց կյանքն են զոհաբերել խաղաղության ապահովման համար: Նրանց շարքերում քիչ չեն եղել նաև լոռեցիները: Այսօր կրկին մեր խոնարհումն ենք բերելու և հարգանքի տուրք ենք մատուցելու բոլոր հերոսների հիշատակին: