Լոռու մարզպետի աշխատակազմ

Կհարատևենք, եթե միասնական լինենք 20.09.2023

Սիրելի՛ հայրենակիցներ, լոռեցինե՛ր, Երեսուներկու տարի առաջ՝ այս օրը, իրականություն դարձավ մեր ժողովրդի բաղձալի երազանքը՝ մեր երկիրը հռչակվեց անկախ հանրապետություն: Բայց այդ երազանքը մեզ հենց այնպես չտրվեց, այն ողողված է արյունով, կորուստներով, արցունքներով, ուստի այն առավել քան թանկ է մեզ համար: Ցավոք, այս տոնական օրը տխրությամբ ու տագնապով է լցված, քանզի Լեռնային Ղարաբաղի մեր հայրենակիցները կենաց ու մահու կռիվ են տալիս՝ հանուն լինելիության, հանուն իրենց բնօրրանում ապրելու իրավունքի:

Լոռու մարզպետ Արամ Խաչատրյանի շնորհավորական ուղերձը Գիտելիքի օրվա առթիվ 01.09.2023

Սիրելի՛ դպրոցականներ, ուսանողնե՛ր, մանկավարժնե՛ր, կրթության բնագավառի հարգարժա՛ն ներկայացուցիչներ, ի սրտե շնորհավորում եմ ձեզ Սեպտեմբերի 1-ի՝ Գիտելիքի օրվա առթիվ: Այսօր շատ նշանակալի օր է մեզ համար, քանզի սեպտեմբերի 1-ն ազդարարում է նոր ուսումնական տարվա սկիզբը, ինչը մեզ՝ բոլորիս, նոր ձեռքբերումների վստահություն է տալիս: Առանձնահատուկ կերպով ուզում եմ շնորհավորել հատկապես առաջին դասարանցիներին, ովքեր նոր պետք է ոտք դնեն գիտելիքի զարմանահրաշ մի աշխարհ, որը Դպրոց է կոչվում: Հորդորս մեկն է՝ լա՛վ սովորեք և այդ գիտելիքը ծառայեցրեք ձեզ, ձեր ընտանիքին ու մեր երկրին: Նաև շատ կարևոր է լավ մարդ ու քաղաքացի լինելը, ինչը ևս ձեզ անպայման կսովորեցնեն ձեր ուսուցիչները:

Լոռու մարզպետ Արամ Խաչատրյանի շնորհավորական ուղերձը Երիտասարդության միջազգային օրվա առթիվ 11.08.2023

Սիրելի երիտասարդնե՛ր Սրտանց շնորհավորում եմ ձեզ Երիտասարդների միջազգային օրվա առթիվ: Դուք եք մեր ապագայի հույսն ու երազանքներն իրականացնողը: Ուրախությամբ պետք է փաստենք, որ մեր երկիրն այսօր ունի այնպիսի երիտասարդություն, որն իր անսպառ եռանդով ու ավյունով կանգնած է մեր երկրի ու ժողովրդի բարօրությանն ուղղված յուրաքանչյուր նախաձեռնության առաջնագծում: Մեր երկրի, այդ թվում՝ Լոռու մարզի երիտասարդները փայլում են բոլոր ասպարեզներում՝ կրթության, գիտության, մշակույթի, սպորտի և այլն՝ մեզ տալով հավատ ու վստահություն առ այն, որ մեր երկրի ապագան հուսալի ձեռքերում է: Ներկայի որակյալ և կիրթ երիտասարդությունը կայուն և պայծառ ապագայի առհավատչյան է:

Լոռու մարզպետ Արամ Խաչատրյանի շնորհավորական ուղերձը Շինարարի օրվա առթիվ 11.08.2023

Սիրելի՛ շինարարներ, ոլորտի՛ նվիրյալներ, սրտանց շնորհավորում եմ Ձեզ Շինարարարի օրվա առթիվ: Այսօր դուք շարունակում եք մեր նախնիների գործն ու ձեզնից է կախված նաև, թե ինչ ենք փոխանցելու հաջորդ սերունդներին։ Ձեր գործն անչափ կարևոր է մեր մարզի բոլոր բնակավայրերի համար, որովհետև ձեր աշխատանքով է, որ չքնաղ Լոռիում կառուցվում են շենքեր, այգիներ, ճանապարհներ, եկեղեցիներ, այլ կառույցներ: Շինարարի աշխատանքի արդյունքով են նաև պայմանավորված մեր ազգային տնտեսության զարգացումը, ժողովրդի բարեկեցությունը և, առհասարակ, մեր երկրի շենացումը: Ուստի զարմանալի չէ շինարարի հանդեպ մեր ժողովրդի ունեցած հարգանքն ու ակնածանքը, քանզի հենց նրա ձեռքերով են վեր հառնում ազգային հարստություններն ու փոխանցվում գալիք սերունդներին:

Լոռու մարզպետ Արամ Խաչատրյանի շնորհավորական ուղերձը Երկաթուղայինների օրվա կապակցությամբ 04.08.2023

Հարգելի՛ երկաթուղայիններ Ամեն տարվա օգոստոսի առաջին կիրակի օրը նշվում է՝ որպես Երկաթուղայինների օր, ուստի թույլ տվեք այս տոնական օրվա առիթով իմ անկեղծ և ջերմ շնորհավորանքներն ուղղել ձեզ՝ մասնագիտական տոնի` Երկաթուղայինի օրվա կապակցությամբ: Երկաթուղային տրանսպորտը միշտ էլ հատուկ տեղ է զբաղեցրել Հայաստանի, մասնավորապես՝ Լոռու մարզի կյանքում: Մեր մարզում է գտնվում երկաթուղային տրանսպորտի ամենաբարդ ինժեներական կառույցը: Մարզն ունի 12 երկաթուղային կայան, որոնց անխափան գործունեությունն ապահովվում է հենց ձեր՝ գիշերուզօր, անշահախնդիր, տքնաջան աշխատանքի շնորհիվ: