Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Դարպաս գյուղի դպրոցի ինտենսիվ այգին արդեն բերք է տալիս 22.09.2021
Դարպաս գյուղում ՄԱԿ- ի Պարենի համաշխարհային ծրագրի ֆինանսական աջակցությամբ և Լոռու մարզպետարանի հետ համագործակցությամբ «Կանաչ արահետ» ՀԿ-ի կողմից իրականացվել է հերթական կարևոր ծրագիրը. «Ինտենսիվ պտղատու և հատապտղային այգիների հիմնում դպրոցամերձ տարածքներում» ծրագրի շրջանակներում Դարպասի դպրոցը նույնպես ինտենսիվ այգի ունի: Այս համագործակցության շրջանակներում մարզում նման 8 այգի է հիմնվել: Այգու բացմանը ներկա էին Լոռու մարզպետարանի կրթության, մշակույթի և սպորտի վարչության պետ Արամ Գրիգորյանը, ՄԱԿ Պարենի համաշխարհային ծրագրի «Դպրոցական սնունդ» ծրագրի համակարգող Մարիա Մուրադյանը, «Կանաչ արահետ» ՀԿ-ի նախագահ Նունե Սարուխանյանը, հոգևոր հովիվ Տեր Վահան քահանա Ազարյանը, մարզային իշխանության ներկայացուցիչներ, ոլորտի մասնագետներ ու համայնքի բնակիչներ:
ՀՀ ֆուտբոլի ֆեդերացիայի և Մարգահովիտի համայնքապետարանի համատեղ ներդրմամբ, Լոռու մարզպետարանի և Մարգահովիտի դպրոցի համագործակցությամբ կառուցված ֆուտբոլի մարզադաշտի բացման արարողությունը կրկնակի խորհուրդ ուներ. մարզադաշտի կառուցումը ինքնին մեծ նշանակություն ունի դպրոցի համար, մինչդեռ այն, որ մարզադաշտն անվանակոչվում է նաև արցախյան 44-օրյա պատերազմում հերոսաբար ընկած, դպրոցի սան Արման Դերձյանի անվամբ, առավել հուզիչ և պարտավորեցնող է: Մարզադաշտի բացման և վերջինիս անվանակոչության առթիվ հանդիսավոր միջոցառում էր կազմակերպվել դպրոցի բակում: Միջոցառմանը մասնակցում էին մարզպետի տեղակալ Գոռ Ասրյանը, Լոռու մարզպետարանի, ուժային կառույցների, զինվորականության, համայնքի ներկայացուցիչներ:
Շնորհակալագրերով պարգևատրվեցին բարերարները 17.09.2021
Վանաձորի թիվ 28 հիմնական դպրոցը վերջերս անվանակոչվեց արցախյան 44-օրա պատերազմում զոհված բժիշկ Վահե Մելիքսեթյանի անունով, դպրոցի սաներ հանդիսացող զոհված զինծառայողների անուններով կոչվեցին նաև դասասենյակներ: Կրթօջախի մի խումբ շրջանավարտներ էլ նախաձեռնություն ցուցաբերեցին և աջակցեցին այդ դասասենյակների վերանորոգմանը: Բարձր գնահատելով նման աջակցությունը՝ մարզպետ Արամ Խաչատրյանն այսօր շնորհակալագրեր հանձնեց Արմեն Հարությունյանին, Հարություն Հարությունյանին, Մհեր Մանուկյանին և Գոռ Միկինյանին:
Արևաշող համայնքի կենտրոնական ճանապարհը կհիմնանորոգվի 17.09.2021
Պետություն-համայնք համատեղ ներդրմամբ իրականացվող սուբվենցիոն միջոցներով այս տարի նախատեսվում է վերանորոգել համայնքի կենտրոնական ճանապարհի 251 մ երկարությամբ և 6 մ լայնությամբ ճանապարհահատվածը` ասֆալտապատման միջոցով: Ընդհանուր բյուջեն կազմում է մոտ 15.44 մլն դրամ, որից 5.4 մլն դրամը՝ պետական, 10.04 մլն դրամը համայնքային ներդրումն է: Ծրագրի շահառու է մոտ 3100 բնակիչ:
Մեդալներ՝ զոհված հերոսների և շնորհակալագիր՝ ժամկետային զինծառայողի հարազատներին 15.09.2021
Լոռու մարզպետ Արամ Խաչատրյանը և ՀՀ ՊՆ Զ և ԶՀ ծառայության Լոռու մարզային տարածքային ստորաբաժանման ղեկավար Սամվել Գևորգյանը «6-րդ ՊՇ անձնուրաց պաշտպան» մեդալով հետմահու պարգևատրեցին լոռեցի զինծառայողների ընտանիքների: - Խոնարհվում եմ բոլորի առջև, Ձեր որդիներն իրենց կյանքի գնով մեզ կյանք նվիրեցին՝ թույլ չտալով նոր ցեղասպանություն: Նրանց սխրանքն անգնահատելի է: Ցավն ու վիշտ մեր հոգիներում է, բայց պարտավոր ենք ուղղել մեր մեջքը: Ձեր կողքին ենք և պատրաստ ենք լսելու յուրաքանչյուրիդ: Փա՛ռք մեր նահատակներին,- ասաց Ա. Խաչատրյանը:
Մարզի ղեկավարը շնորհակալագիր հանձնեց վաստակաշատ մանկավարժին 15.09.2021
Մարգահովիտի Հովհաննես Թումանյանի անվան միջնակարգ դպրոցի տնօրեն Աշոտ Անտինյանը նշում է ծննդյան 60-ամյակը: Վաստակաշատ մանկավարժն արդեն 30 տարի զբաղեցնում է նաև դպրոցի տնօրենի պաշտոնը: Մարզպետ Արամ Խաչատրյանն այսօր հյուրընկալել էր նրան՝ իր գնահատանքի խոսքը հղելու և շնորհակալագիր հանձնելու: - Դուք գնահատելի ավանդ ունեք Մարգահովիտիմիջնակարգ դպրոցում ուսումնական և կրթադաստիարակչական գործընթացը բարձր մակարդակով կազմակերպելու գործում: Ձեր ղեկավարման տարիներին դպրոցի բազմաթիվ շրջանավարտներ իրենց ներդրումն են ունեցել կրթության, գիտության, մշակույթի ու արվեստի, ռազմական գործի և միջազգային հարաբերությունների բնագավառներում: Մաղթում եմ հաջողություն մանկավարժական և ղեկավարի Ձեր հետագա բեղմնավոր գործունեության մեջ,- ասաց նա:
