Լոռու մարզպետի աշխատակազմ

Լոռու մարզի Ագարակ բնակավայրում իրականացվում են համայնքի բնակիչների համար կարևոր նշանակություն ունեցող երկու խոշոր ծրագրեր՝ մանկապարտեզի հիմնանորոգում և խմելու ջրի ու կոյուղու համակարգերի վերականգնում։

Մինչ այս Ագարակ բնակավայրում մանկապարտեզ չի գործել։ Նախադպրոցական կրթության հասանելիությունն ապահովելու նպատակով նախկին գյուղապետարանի շենքը վերափոխվել է մանկապարտեզի, որն այժմ հիմնանորոգվում է։ Ծրագրի իրականացման համար ներդրվել է 43 մլն դրամ։ Աշխատանքների ավարտից հետո բնակավայրի փոքրիկները հնարավորություն կունենան նախադպրոցական կրթություն ստանալ իրենց բնակավայրում՝ բարեկարգ և հարմարավետ պայմաններում։

Մեկ այլ կարևոր ծրագիր էլ ուղղված է Ագարակի՝ տասնամյակներ շարունակ չլուծված խմելու ջրի խնդրի կարգավորմանը։ 1 մլրդ 350 մլն դրամ ներդրմամբ իրականացվում են խմելու ջրի ներքին ցանցի և կոյուղու համակարգի վերականգնման աշխատանքներ։ Ծրագրի ավարտին ագարակցիները կունենան շուրջօրյա՝ 24-ժամյա ջրամատակարարում։