Լոռու մարզպետի աշխատակազմ

ԿԳՄՍ նախարարությունն ու «Հայ Փոքրիկ Երգիչներ» միջազգային ընկերակցությունն իրականացնում են մշակութային կրթության աջակցության ծրագիր՝ նոր ձևաչափով։

Այն ներառում է վարպետաց դասեր, դասալսումներ և դպրոցների մասնագիտական գնահատում Հայաստանի բոլոր մարզերում։ Ծրագրի շրջանակում ապրիլի 25-ից մեկնարկել է նաև համապետական մրցույթ՝ «Հայրենիքն, արվեստն ու ես» խորագրով։

«Հայրենիքն, արվեստն ու ես» մրցույթը կազմակերպվում է Հայաստանի Հանրապետության երաժշտական, արվեստի, գեղարվեստի, պարարվեստի դպրոցներում կրթություն ստացող աշակերտների համար՝ նպատակ ունենալով բացահայտել շնորհալի և ստեղծագործական ներուժ ունեցող երեխաներին, խթանել մշակութային կրթության զարգացումը և ապահովել մասնագիտական աճի հնարավորություններ։

Լոռու մարզի 21 դպրոցների շուրջ 125 շնորհալի սաներ մասնակցել են 1-ին փուլի լսումներին, որոնցից 22 մենակատարներ, 7 երգչախմբեր, 1 պարախումբ, 10 գեղարվեստի բաժնի աշակերտներ անցել են 2-րդ փուլ:

Այսօր անցկացվել են երկրորդ փուլի լսումները, որին ներկա են եղել Լոռու մարզպետի աշխատակազմի կրթության, մշակույթի և սպորտի վարչության պետ Նաիրա Բարիկյանը, վարչության առաջատար մասնագետ Մանուշակ Քոչարյանը:

Երկրորդ փուլի հաղթողները կմասնակցեն եզրափակիչ փուլին, որը տեղի կունենա հոկտեմբերին՝ Երևանում: