Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Պարտադիր զինվորական ծառայության մեկնեցին ձմեռային զորակոչի առաջին նորակոչիկները
09.01.2025
ՀՀ ՊՆ Լոռու մարզի զինվորական կոմիսարիատի Վանաձորի բաժանմունքից պարտադիր ժամկետային զինվորական ծառայության մեկնեցին ձմեռային զորակոչի առաջին նորակոչիկները՝ Վանաձոր և Փամբակ համայնքներից:
Զորակոչի առթիվ կազմակերպված միջոցառմանը մասնակցում էին Լոռու մարզպետ Արամ Ղազարյանը, փոխմարզպետ Գոռ Ասրյանը, Վանաձորի Սուրբ Գրիգոր Նարեկացի մայր եկեղեցու հոգևոր հովիվ, արժանապատիվ տեր Տաճատ քահանա Բարսեղյանը, ՀՀ ՊՆ զորակոչային և զորահավաքային համալրման ծառայության Լոռու մարզի տարածքային ստորաբաժանման պետի ժամանակավոր պաշտոնակատար, փոխգնդապետ Սարգիս Վահրադյանը, ՀՀ ՊՆ ՌՈ Վանաձորի ռազմական ոստիկանության բաժնի պետ, փոխգնդապետ Վահան Անտոնյանը, Փամբակ համայնքի ղեկավար Սուրեն Կոստանդյանը, Վանաձոր համայնքի ղեկավարի խորհրդական Արման Բերնեցյանը, մարզպետի աշխատակազմի, համայնքապետարանների, ուժային կառույցների, իրավապահ մարմինների ներկայացուցիչներ, պաշտոնատար այլ անձինք, զինակոչիկների հարազատներ ու ընկերներ:
Ներկաներին ողջույնի և ոգեշնչման խոսքեր հղեց մարզի ղեկավար Արամ Ղազարյանը: Նա նորակոչիկներին մաղթեց անփորձանք ծառայություն և բարի վերադարձ հայրենի օջախներ.
- Սիրելի՛ նորակոչիկներ, վստահ եմ, որ յուրաքանչյուրդ Հայաստանի Հանրապետության բանակի շարքերը համալրելու եք մեկ կարևոր գիտակցությամբ՝ հայրենասիրությամբ ու հայ տղամարդուն վայել արժանապատվությամբ: Դուք մեկնում եք փոխարինելու ձեր ավագ ընկերներին՝ որպես Հայաստանի Հանրապետության անվտանգության երաշխավորներ,- ասաց մարզի ղեկավարը։
Տաճատ քահանա Բարսեղյանը օրհնության խոսք հղեց նորակոչիկներին։ Ներկաները միասնական աղոթք բարձրացրին զինվորների խաղաղ և անփորձանք ծառայության համար։
Վանաձոր համայնքի ղեկավարի պաշտոնակատար Արկադի Փելեշյանի և իր անունից զինակոչիկներին բարի ծառայություն մաղթեց նաև համայնքի ղեկավարի խորհրդական Արման Բերնեցյանը:
