Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Վանաձորի Էդուարդ Կզարթմյանի անվան երաժշտական դպրոցը 90 տարեկան է
25.11.2024
Սրբազան հայր,
Հարգելի պարոն Փելեշյան, տիկին Հարությունյան, հարգելի ուսուցիչներ, աշակերտներ, ներկաներ, հյուրեր
Ինձ համար մեծ պատիվ է ներկա լինել բազում ավանդույթներով ու հարուստ պատմությամբ լի մի կրթօջախի, Հայաստանի Խորհրդային Սոցիալիստական Հանրապետության ժողովրդական արտիստ, հանճարեղ կոմպոզիտոր, խմբավար Էդվարդ Կզարթմյանի անունը կրող երաժշտական դպրոցի հոբելյանական 90-րդ տարեդարձի միջոցառմանը և այս բեմից ողջունելու և ջերմորեն շնորհավորելու դպրոցի ավանդույթներն ու անունը բարձր պահող կոլեկտիվին, սաներին:
Այս կրթադաստիարակչական ուսումնական հաստատությունը մեր քաղաքի հարուստ պատմություն ունեցող երաժշտական դպրոցներից է, և հատկանշական է, որ կրում է հենց հիմնադրի անունը:
Սա, ինչ խոսք, նաև պարտավորեցնող հանգամանք է՝ գործունեությամբ և կատարված աշխատանքով արժանի լինել մեծն կոմպոզիտորի անվանը:
Տեղյակ եմ, որ այս տարիներին դպրոցն ունեցել է բազում ձեռքբերումներ՝ միջազգային, հանրապետական մրցույթների դափնեկիրներ, հարյուրավոր շրջանավարտներ, որոնցից շատերը փայլել են լավագույն բեմերում և բարձր պահել մարզի, Վանաձորի և դպրոցի պատիվը:
Դպրոցը, զգալիորեն տուժելով 1988-ի ավերիչ երկրաշարժից, այդուհանդերձ չի դադարեցրել դասապրոցեսը և անգամ դժվարին իրավիճակում՝ առանց ջեռուցման պայմանների և անգամ հովհարային անջատումների ընթացքում անխափան աշխատել՝ կարևորելով երեխաների երաժշտական և գեղագիտական դաստիարակությունը: Սա ևս խոսում է նվիրված և անշահախնդիր աշխատանքի մասին, ինչն արժանի է ամենաբարձր գնահատականի: Հետագա տարիներին դպրոցը հիմնանորգվել է պետբյուջեի միջոցներով, այժմ էլ գտնվում է պետության և համայնքի հոգածության ներքո:
Սիրելի՛ ներկաներ
Բոլորս քաջ գիտակցում ենք, երաժշտական դպրոց հաճախող յուրաքանչյուր շրջանավարտ մեծ երաժիշտ չի դառնում, կարևոր է, սակայն, որ այստեղից դուրս եկող յուրաքանչյուր սան ունենա գեղագիտական ու երաժշտական ճաշակ, սեր հայ մշակույթի ու երաժշտության, սեր՝ ազգային ու դասական արվեստի նկատմամբ և դուք, սիրելի՛ կզարթմյանցիներ, այդ կարևոր առաքելությունն իրականացրել և շարունակում եք իրականացնել մեծ պատվով, ինչի համար, իմ խորին երախտագիտությունը ձեզ:
Այս հոբելյանական առիթն օգտագործելով՝ ուզում եմ խոնարհում հայտնել ոչ միայն հիմնադրի՝ Էդվարթ Կզարթմյանի, այլև անցած տարիների բոլոր նվիրյալ տնօրենների և դասատուների հիշատակի առջև ու քաջ առողջություն, երկարակեցություն և երախտագիտություն հայտնել բոլոր այն նվիրյալ մասնագետներին, ովքեր իրենց մեծագույն ավանդն են բերել դպրոցի կայացման և արժանի սաների պատրաստման գործում: Ուզում եմ բոլորս ծափողջույններով ողջունենք նրանց......
Կրկին շնորհավորելով բոլորիս այս հոբելյանական տարեդարձի առթիվ՝ դպրոցին մաղթում եմ երկար տարիների բեղուն գործունեություն, բազում նվաճումներ և հանրահռչակ սաներ:
Եվ վերջում թույլ տվեք շնորհակալագրերով պարգևատրել մի շարք նվիրյալ դասատուների, ովքեր իրենց մեծ ավանդն են բերել դպրոցի կայացման գործում: Վստահ եմ՝ նրանց թիվը շատ ավելին է և ես դեռ բազում առիթներ կունենամ պարգևատրելու բոլոր արժանավորներին:
