Լոռու մարզպետի աշխատակազմ

Լոռու մարզպետ Արամ Ղազարյանի նախաձեռնությամբ և մասնակցությամբ՝ հոկտեմբերի 4-ին՝ «Ուսուցչի օրվան» ընդառաջ, կազմակերպվել էր միջոցառում:

Միջոցառմանը ներկա էին Լոռու մարզպետի աշխատակազմի կրթության, մշակույթի և սպորտի վարչության պետ Գարեգին Քարհանյանը, մարզպետի աշխատակազմի պատասխանատու այլ պաշտոնյաներ, դպրոցների տնօրեններ, վաստակաշատ ուսուցիչներ:

Մարզի ղեկավարը մասնագիտական տոնի կապակցությամբ շնորհավորել է բոլոր ուսուցիչներին, կարևորել և բարձր գնահատել յուրաքանչյուր մանկավարժի անուրանալի վաստակը:

- Դուք նոր սերնդին տալիս եք ոչ միայն գիտելիքներ, այլև ավանդում եք մեր ժողովրդի հայրենասիրության դարավոր ոգին, Հայաստանի Հանրապետության արժանավոր քաղաքացին ու զինվորը լինելու բարձր գիտակցումը: Շնորհակալություն ձեզ՝ մեծավանդ ու արգասաբեր գործունեության համար,- ասել է Լոռու մարզպետը:

Նա նաև նշել է, որ պարգևատրման համար ընտրվել են մի խումբ ուսուցիչներ և տնօրեններ՝ որոշակի չափորոշիչներից ելնելով, թեև մեր մարզում արժանիները շատ ավելին են:

Արամ Ղազարյանն անդրադարձել է նաև կրթության ոլորտում իրականացվող բարեփոխումներին, ուսուցիչների մասնագիտական կարողությունները բարձրացնելու և ժամանակակից պահանջներին ուղղված վերապատրաստման ու ատեստավորման ծրագրերին՝ ընդգծելով, որ դրանք կնպաստեն կրթական համակարգի լիարժեք կայացմանը:

Միջոցառման ընթացքում մանկավարժության ոլորտում ունեցած վաստակի և դպրոցի զարգացման գործում ունեցած գնահատելի աշխատանքի համար մարզի ղեկավարը շնորհակալագրերով է պարգևատրել 81 վաստակաշատ մանկավարժի:

Պարգևատրվող մանկավարժների ընտրությունը Լոռու մարզպետի աշխատակազմի կողմից կատարվել էր հետևյալ սկզբունքով՝ կամավոր ատեստավորման մասնակցության գործընթացում 90 տոկոս կամ ավելի արդյունք ցուցաբերած,3-րդ և 4-րդ աստիճանի տարակարգ ստացած ուսուցիչներ,ԿԳՄՍ նախարարության կողմից հանրակրթության պետական չափորոշչի ներդրման լավագույն փորձառության խրախուսմանն ուղղված նախաձեռնության շրջանակում տարբեր անվանակարգերում «Լավագույնի» կոչմանն արժանացած տնօրեններ, տեղակալներ, ուսուցիչներ, օգնականներ և խմբակավարներ,2024 թվականի ընթացքում կենսաթոշակի անցած տնօրեններ:

Նշենք, որ Լոռու մարզում գործում է 160 դպրոց, որտեղ աշխատում է 2777 ուսուցիչ: