Լոռու մարզպետի աշխատակազմ

Օգոստոսի 1-ին Վանաձորի Շառլ Ազնավուրի անվան մշակույթի պալատում հանդիսավորությամբ անց է կացվել «Vanadzor Open 2024» շախմատի միջազգային մրցաշարի բացման արարողությունը, որին մասնակցում է 8 երկրների 300 մարզիկ, այդ թվում նաև՝ գրոստմայստերներ: Միջոցառումը նախաձեռնել է Հաշմանդամների շախմատի աշխարհի չեմպիոն, Հաշմանդամների շախմատի օլիմպիադայի արծաթե մեդալակիր, ՖԻԴԵ-ի վարպետ Սարգիս Սարգսյանը:

Միջոցառման կազմակերպմանն իր աջակցությունն է ցուցաբերել նաև Լոռու մարզպետի աշխատակազմը՝ ի դեմս մարզպետ Արամ Ղազարյանի:

Բացման հանդիսավոր արարողությանը ներկա էին Լոռու մազպետի տեղակալ Գոռ Ասրյանը, մարզպետի աշխատակազմի պատասխանատու այլ պաշտոնյաներ:

Մարզպետի տեղակալը ողջունեց ներկաներին Լոռու մարզպետ Արամ Ղազարյանի և իր անունից՝ մաղթելով մրցաշարին հաջող ընթացք, մասնակիցներին՝ հաղթանակներ: Կարևորելով նման մրցաշարի անցկացումը հենց Վանաձորում ՝ նա նշեց, որ այն մեծապես կնպաստի ինչպես մարզաձևի զարգացմանն, այնպես էլ՝ զբոսաշրջային հոսքերի մեծացմանը:

 Փոխմարզպետը հույս հայտնեց, որ մրցաշարը ամենամյա կդառնա և էլ ավելի կընդլայնի մասնակից երկրների և մարզիկների թիվը: Նա նաև շնորհակալություն հայտնեց Սարգիս Սարգսյանին՝ մրցաշարի նախաձեռնության համար:

Վերջինս նույնպես ողջունելով ներկաներին և մասնակիցներին՝ շնորհակալություն հայտնեց մրցաշարի կազմակերպմանն աջակցելու համար:

Միջոցառումն ուղեկցվում էր երաժշտական կատարումներով:

 Մրցաշարը կշարունակվի մինչև օգոստոսի 7-ը: