Տեղեկատվական կենտրոն
Նորություններ
Քննարկվել են մարզի ջրային ռեսուրսների կառավարման վերաբերյալ օրախնդիր հարցեր
02.05.2024
![](http://lori.mtad.am/files/n_pics/38263_s.jpg)
ԱՄՆ ՄԶԳ «Հարավային Կովկասի տարածաշրջանային ջրային ռեսուրսների կառավարում» ծրագրի ներկայացման նպատակով Լոռու մարզպետի տեղակալ Գոռ Ասրյանի գլխավորությամբ ապրիլի 30-ին անց է կացվել հանդիպում-քննարկում:
Հանդիպմանը մասնակցել են ՀԿՏՋՌԿ ծրագրի հայաստանյան ղեկավար Արա Նազինյանը, կառավարման մասնագետ Տատյանա Սարգսյանը, Լոռու մարզի համայնքների ղեկավարները, Լոռու մարզպետի աշխատակազմի պատասխանատու պաշտոնյաները, «Վեոլիա ջուր» ՓԲԸ-ի «Լոռի» շահագործման տեղամասի պետ Ալեքսանդր Բաղդասարյանը, ջրօգտագործող ընկերությունների ներկայացուցիչները:
Հանդիպման նպատակն էր համայնքների պատասխանատուների, ջրօգտագործող ընկերությունների հետ քննարկել ծրագրի շրջանակներում համագործակցության հնարավորությունները:
«Հարավային Կովկասի տարածաշրջանային ջրային ռեսուրսների կառավարում» ծրագիրն իրականացվում է «Դելոյթ Քոնսալթինգ Էլ-Էլ-Սի» ընկերության կողմից՝ ԱՄՆ Միջազգային զարգացման գործակալության ֆինանսավորմամբ։ Ծրագրի նպատակն է աջակցել արդյունավետ անդրսահմանային համագործակցությանը և ջրային ռեսուրսների կառավարմանը` խթանելու տարածաշրջանային կայունությունը և դիմակայունությունը:
Ծրագրային գործողությունների հիմնական ուղղություններից է աջակցել սահմանամերձ մարզերում համայնքային զարգացմանը՝ նպաստելով ջրային ռեսուրսների արդյունավետ կառավարմանը և ջրային անվտանգության ամրապնդմանը:
Ծրագրի տևողությունը 5 տարի է, որի շրջանակներում հնարավորություն է տրվում Լոռու և Տավուշի մարզերի համայնքներին, շահագրգիռ կազմակերպություններին կազմել մրցութային առաջարկներ մարզերի ջրային ռեսուրսների կառավարման վերաբերյալ և ներկայացնել մրցույթի: Մրցունակ փաթեթները ծրագրի շրջանակում կստանան մինչև 100.000 դոլար աջակցություն՝ իրականացնելու տվյալ աշխատանքներն իրենց համայնքներում:
Գոռ Ասրյանը մարզպետ Արամ Ղազարյանի և իր կողմից ողջունել է «Հարավային Կովկասի տարածաշրջանային ջրային ռեսուրսների կառավարում» ծրագրի մեկնարկը մարզում և նշել, որ Լոռու մարզպետի աշխատակազմը պատրաստակամ է աջակցելու ծրագրի արդյունավետ իրականացմանը: Նա հորդորել է համայնքների ղեկավարներին ակտիվորեն մասնակցել ծրագրին:
Պատասխանատուներն իրենց հերթին նշել են, որ «Հարավային Կովկասի տարածաշրջանային ջրային ռեսուրսների կառավարում» ծրագիրը մեծ հնարավորություն է համայնքներում ջրային ռեսուրսների հետ կապված կարևոր խնդիրների լուծման տեսանկյունից: