Լոռու մարզպետի աշխատակազմ

Լոռու մարզպետ Արամ Ղազարյանը, ԿԳՄՍ նախարարի տեղակալ Արաքսիա Սվաջյանը, «Հայաստանի մանուկներ» հիմնադրամի (COAF) գործադիր տնօրեն Լիանա Ղալթաղչյանը ապրիլի 10-ին մասնակցել են Փամբակ խոշորացված համայնքի Դեբետ բնակավայրում կառուցվելիք հանրակրթական դպրոցի հիմնարկեքի արարողությանը:
Ներկա էին նաև Լոռու մարզպետի աշխատակազմի կրթության, մշակույթի և սպորտի վարչության պետ Գարեգին Քարհանյանը, Փամբակ համայնքի ղեկավար Սուրեն Կոստանդյանը, ՔՈԱՖ-ի ներկայացուցիչներ, մարզպետի աշխատակազմի պատասխանատու պաշտոնյաներ, հյուրեր:
Դեբետի դպրոցը կառուցվում է «Հայաստանի մանուկներ» բարեգործական հիմնադրամի «Գյուղական համայնքների համապարփակ զարգացման ծրագրերի» շրջանակներում՝ COAF-ի բարերարներ Հարություն և Սյուզան Մանգոյանների ժառանգների հովանավորությամբ:
Ծրագրի արժեքն ավելի քան 1.7 միլիոն ԱՄՆ դոլար է:
ԿԳՄՍ նախարարի տեղակալը և Լոռու մարզպետն իրենց ելույթներում անդրադարձել են հանրակրթության ոլորտում պետական միջոցներով կատարվող ներդրումներին, մասնավորապես 300 դպրոց և 500 մանկապարտեզ կառուցելու, վերանորոգելու, հիմնանորոգելու կառավարության ծրագրերին, որը նպատակ ունի Հայաստանի բոլոր բնակավայրերում կրթական բարենպաստ պայմաններ ստեղծելով՝ կրթությունը դարձնել առավել հասանելի։
-Վստահ եմ, որ լավ կրթական միջավայրում, կրթության հարուստ բովանդակությամբ, արհեստավարժ ուսուցիչներով նոր դպրոց կունենանք: Շնորհակալություն այն մարդկանց, ովքեր իրենց ներդրումն են ուզում ունենալ մեր երկրում կրթության ոլորտում փոփոխություններին ուղղված ծրագրերին,- ասել է Արաքսիա Սվաջյանը:
Լոռու մարզպետ Արամ Ղազարյանը ևս շնորհավորել է ներկաներին դպրոցի շինարարության մեկնարկի կապակցությամբ: Նա շնորհակալության է հայտնել «Հայաստանի մանուկներ» բարեգործական հիմնադրամին և բարերարներին ծրագիրը Դեբետում իրականացնելու համար:
- Կարժ ժամանակում ունենալու ենք նորարարական և առաջադեմ կրթական կառույցներ, որոնք կօգնեն աշակերտներին ստեղծարար միջավայրում բացահայտել իրենց ներուժը, զարգացնել կարողությունները՝ ստանալով որակյալ կրթություն: Լիահույս եմ, որ համատեղ ծրագրերով կունենաք կրթված հասարակություն և զարգացած համայնքներ,- ասել է Արամ Ղազարյանը:
Դպրոցի կառուցման «Գիր հաստատման» հուշաթուղթը, բարերների ստորագրությամբ և դպրոցի կրտսեր աշակերտների ձեռքերով, դրվեց շինության հիմքում, որով տրվեց Դեբետի դպրոցի շինարարության պաշտոնական մեկնարկը:
Կառուցվելիք դպրոցը կլինի կրթության արդի չափանիշներին համապատասխան կրթօջախ. կունենա ժամանակակից դասարաններ, լաբորատորիաներ, ստեղծագործական տարածքներ, սպորտային խաղահրապարակներ՝ Դեբետում ստեղծելով նոր կրթական միջավայր: ՀՀ կրթության, գիտության, մշակույթի և սպորտի նախարարության հետ սերտ համագործակցության արդյունքում դպրոցի շենքը հագեցած կլինի գերժամանակակից սարքավորումներով, որոնք կխթանեն արդյունավետ ուսուցման գործընթացը։
Նոր դպրոցը կծառայի՝ որպես հիմնական ուսումնական հաստատություն՝ ներառելով տարրական, միջնակարգ և ավագ դպրոցների ծրագրերը։ Շենքը կբավարարի շուրջ 190 աշակերտի ուսումնառության պահանջները: Դպրոցի բացումը նախատեսվում է 2025 թվականի սեպտեմբերին:
Դեբետի միջնակարգ դպրոցում այժմ սովորում է 114 աշակերտ, նրանց ուսումնառությունը ժամանակավորապես կազմակերպվում է COAF ՍՄԱՐԹ կենտոնում և Դեբետի վարչական շենքում: