Լոռու մարզպետի աշխատակազմ

Այսօր Լոռու մարզպետ Արամ Խաչատրյանն անցկացրեց աշխատանքային խորհրդակցություն մարզպետի տեղակալներ Գոռ Ասրյանի, Հովհաննես Ավետիսյանի, գլխավոր քարտուղար Կամո Աշրաֆյանի, մարզպետի աշխատակազմի կառուցվածքային ստորաբաժանումների ղեկավարների և պատասխանատու այլ պաշտոնյաների մասնակցությամբ:
Ներկայացվեցին մարզի ղեկավարի կողմից տրված հանձնարարականների կատարման ընթացքը, հաշվետու ժամանակահատվածում իրականացված աշխատանքները, առաջիկա ծրագրերը։
Խորհրդակցության ընթացքում անդրադարձ կատարվեց գյուղատնտեսության, առողջապահության և սոցիալական ապահովության, քաղաքաշինության և հողաշինության, կրթության, մշակույթի և սպորտի ոլորտներին, զարգացման ծրագրերի, զբոսաշրջության, արտաքին կապերի, երեխաների իրավունքների պաշտպանության ուղղությամբ տարված աշխատանքներին, ինչպես նաև ընթացիկ փաստաթղթաշրջանառության, անձնակազմի կառավարման, իրավաբանական և մի շարք այլ հարցերի:
Ներկայացվեց, որ մշակովի ցանքատարածությունները նախորդ տարվա համեմատությամբ ավելացել են 722 հա-ով՝ կազմելով 22.761.5 հա, ինչը բավականին ողջունելի ցուցանիշ է՝ շնորհիվ պետական աջակցության, ինչպես նաև միջազգային կառույցների կողմից իրականացված մի շարք կարևոր ծրագրերի:
Քաղաքաշինության ոլորտի հետ կապված տեղեկացվեց, որ 2023թ. համար ներկայացված 50 ծրագրերից հաստատված են 47-ը՝ շուրջ 7.8 մլրդ դրամ ընդհանուր արժողությամբ: 2024թ.-ի համար մարզի համայնքների կողմից արդեն իսկ ներկայացված է սուբվենցիոն ծրագրի 62 հայտ՝ 12.3 մլրդ դրամ ընդհանուր արժողությամբ: Իրականացվում են նախագծանախահաշվային աշխատանքներ:
Ներկայացվեց մարզում ընթացող ճանապարհաշինական ծրագրերի ընթացքը ևս:
Մարզի ղեկավարին զեկուցվեց, որ ավարտված է ամառային զորակոչը, և այն կատարվել է 103 տոկոսով:
Առողջապահության ոլորտում շարունակվում է պատվաստումների իրականացման գործընթացը, այդ թվում՝ կարմրուկի և կորոնավիրուսային հիվանդությունների դեմ: Ի դեպ, մարզում արձանագրվել է կարմրուկի 6 դեպք:
Խորհրդակցության ընթացքում քննարկվեցին նաև այլ հարցեր, տրվեցին հանձնարարականներ: