Լոռու մարզպետի աշխատակազմ

Լոռու մարզպետ Արամ Խաչատրյանն այսօր շնորհակալագրերով պարգևատրեց 2023 թվականի ընթացքում օլիմպիական մարզաձևերի միջազգային մրցաշարերից հաղթանակով վերադարձած լոռեցի մրցանակակիրներին և նրանց մարզիչներին:
Հանդիպմանը ներկա էին Լոռու մարզպետի օգնականներ Էրիկ Կոստանյանը, Տիգրան Խաչատրյանը, Լոռու մարզպետի աշխատակազմի կրթության, մշակույթի և սպորտի վարչության պատասխանատու պաշտոնյաներ:
Արամ Խաչատրյանը ողջունեց մարզիկներին և նշեց, որ հպարտ է լոռեցի մարզիկների արդյունքներով և ոգևորված՝ նրանց մրցելույթներից:
«Մենք՝ իբրև մարզային իշխանություն, պատրաստ ենք քաջալերել և մեր հնարավորության սահմաններում աջակցել սպորտի զարգացմանը: Շնորհավորում եմ ձեզ և ձեր մարզիչներին, ովքեր մեծ նվիրվածությամբ ուժեղագույն մարզիկներ և մրցանակակիրներ են պատրաստում միջազգային տարբեր մրցաշարերում: Նորանոր հաղթանակներ և հաջողություններ եմ մաղթում».- ասաց Ա. Խաչատրյանը:
Մարզիկներն իրենց հերթին շնորհակալություն հայտնեցին Լոռու մարզպետին՝ սպորտին առանձնահատուկ ուշադրություն դարձնելու համար և նշեցին, որ նման հանդիպումները ոգևորում են և պարտավորեցնում նոր հաղթանակների:
Հանդիպման ավարտին Լոռու մարզպետի շնորհակալագրերին արժանացան Իսրայելի Հայֆա քաղաքում վերջերս կայացած սամբոյի Եվրոպայի առաջնության մրցանակակիրներ Արմեն Աղումյանը՝ պատանիների Եվրոպայի առաջնության պատվավոր 1-ին տեղը գրավելու համար, Մխիթար Մխիթարյանը՝ մեծահասակների առաջնության պատվավոր 3-րդ տեղը գրավելու համար, Դավիթ Բարսեղյանը՝ սամբոյի դեռահասների Եվրոպայի առաջնության պատվավոր 2-րդ տեղը գրավելու համար, Նանե Հակոբյանը, Սամվել Դանիելյանը և Անդրեյ Սարդարյանը՝ 3-րդ տեղերը գրավելու համար:
Սամբոյի Եվրոպայի առաջնության հաղթող և մրցանակակիր սաներ պատրաստելու համար շնորհակալագրերի արժանացան Մանվել Խոյեցյանը, Ռաֆիկ Մանուկյանը, Գոռ Հարությունյանը և Ռոբերտ Ավետիսյանը:
Բուլղարիայում կայացած դյուդոյի խուլ-համրերի առաջնությունում պատվավոր 1-ին տեղը գրավելու համար պարգևատրվեց Ռոբերտ Գևորգյանը, հաղթող սան պատրաստելու համար՝ մարզիչ Արտյոմ Մելքոնյանը:
Մոսկվայում կայացած դպրոցականների համաշխարհային 7-րդ խաղերի սեղանի թենիս մարզաձևում պատվավոր 1-ին տեղը գրավելու համար շնորհակալագրերով պարգևատրվեցին Ալեքսանդր Առաքելյանը և մարզիչ Էրիկ Կոստանյանը: