Լոռու մարզպետի աշխատակազմ

Այսօր տեղի ունեցավ Սպիտակ համայնքի Լեռնավան բնակավայրում կառուցված ջրամբարի պաշտոնական բացումը, որին ներկա էին ՀՀ ՏԿԵ փոխնախարար Վաչե Տերտերյանը, Լոռու մարզպետի տեղակալ Հովհաննես Ավետիսյանը, Հայաստանում ՄԱԿ-ի Զարգացման ծրագրի (ՄԱԶԾ) մշտական ներկայացուցիչ Նաթիա Նացվլիշվիլին, նախարարության ներկայացուցիչներ, միջազգային դոնոր-կազմակերպությունների, կառավարության, համայնքի ներկայացուցիչներ, հյուրեր: Ծրագիրը համաֆինանսավորվել է ՄԱԶԾ-ԳԷՀ Փոքր դրամաշնորհների ծրագրի, ՀՀ պետական սուբվենցիայի միջոցներով, «Լեռնավան կլիմայական շրջանառու հիմնադրամի» մասնակցությամբ։
Ծրագրի մեկնարկից՝ 2022 թվականի ամռանից ի վեր, կառուցվել է ջրամեկուսիչ թաղանթով պատված 10,000 մ3 ծավալով ջրամբար՝ Լեռնավան բնակավայրում, ինչի արդյունքում կբարելավվի տեղի բնակիչների կենսամակարդակը, կսկսեն մշակվել նախկինում լքված հողատարածքները: Ջրամբարը կբավականացնի ավելի քան 30 հա հողատարածք ոռոգելու համար:
Միջոցառման ընթացքում հյուրերին տպավորեց նորարարական և ծախսարդյունավետ մեթոդով ջրամբարի մեկուսացումը գեոմեմբրանային թաղանթով, ինչը զգալիորեն խնայել է պետական սուբվենցիայի միջոցները:
Նույն սկզբունքով ջրամեկուսիչ թաղանթով պատված 4,000 մ3 ծավալով ջրամբար է կառուցվել նաև Շենավան բնակավայրում, որը նույնպես պատրաստ է շահագործման:
Բացի այդ, պետական սուբվենցիայի միջոցներից կառուցվել է 12 կմ երկարությամբ ոռոգման ջրի ցանց Շենավանում և 17 կմ երկարությամբ ոռոգման ցանց Լեռնավանում։
Հովհաննես Ավետիսյանը, մարզի ղեկավարի անունից ողջունելով ներկաներին, շնորհակալություն հայտնեց բոլոր աջակից կողմերին և ներդրումներ իրականացնող կազմակերպություններին տեղի բնակչության համար այս չափազանց կարևոր ծրագիրը կյանքի կոչելու համար: Նա նշեց, որ գյուղական համայնքներում ջրամբարների, ոռոգման համակարգերի, ջրատարների կառուցումը ՀՀ կառավարության առաջնահերթյուններից է և Լոռու մարզպետի աշխատակազմը, համայնքները մեծ կարևորություն են տալիս այս ծրագրերին:
-Այս տարածաշրջանում ջրամբարների, ոռոգման համակարգերի, ջրատարների կառուցման ծրագրերը շարունակական են լինելու: Փորձելու ենք ոռոգելի դարձնել բոլոր մշակովի հողատարածքները, ինչը կնպաստի նաև տարածաշրջանին ոչ հատուկ, նաև ոչ ավանդական մշակբույսերի աճեցմանը,-ասաց նա:
Ծրագրի կարևորությունն իրենց ելույթներում ընդգծեցին նաև Վաչե Տերտերյանը,տիկին Նաթիա Նացվլիշվիլին: