Տեղեկատվական կենտրոն
Նորություններ
Լոռու մարզպետն ընդունեց «Իմ կյանքը համայնքում» ծրագրով Լոռու մարզում հյուրընկալված աշակերտներին
19.04.2023
![](http://lori.mtad.am/files/n_pics/34758_s.jpg)
Այսօր Լոռու մարզպետ Արամ Խաչատրյանն ընդունեց ԿԶՆԱԿ հիմնադրամի «Իմ կյանքը համայնքում» աշակերտների փոխանակման մեկշաբաթյա ծրագրով Լոռու մարզում հյուրընկալված 5 աշակերտներին, ովքեր ուսման և ճանաչողական այցի նպատակով այս օրերին Վանաձորի թիվ 21 հիմնական դպրոցում են: Նրանց ուղեկցում էր դպրոցի տնօրեն Աղասի Թովմասյանը:
Հանդիպմանը մասնակցում էին Լոռու մարզպետի աշխատակազմի կրթության, մշակույթի և սպորտի վարչության պետ Արամ Գրիգորյանը, պատասխանատու այլ պաշտոնյաներ:
Լոռու մարզպետը, ողջունելով աշակերտներին, հորդորեց շատ սիրել հայրենիքը, լավ սովորել, երբեք չհանձնվել, հավատալ սեփական ուժերին։ Արամ Խաչատրյանը պատասխանեց պատանիների հարցերին և մաղթեց տպավորիչ ու հիշարժան օրեր Լոռու մարզում:
Հյուրընկալված աշակերտները Սյունիքի մարզի Դարբաս գյուղի միջնակարգ և Կոտայքի մարզի Աբովյան քաղաքի թիվ 2 հիմնական դպրոցներից են: Վանաձորի թիվ 21 դպրոցից էլ Սյունիքում է 3 աշակերտ:
Նրանք այս շաբաթ կսովորեն հյուրընկալած համայնքի դպրոցում, կծանոթանան կրթօջախի առօրյային, հյուրընկալող ընտանիքներում՝ ընդունված ավանդույթներին, իրենց համար նորովի կբացահայտեն Հայաստանի այս գողտրիկ անկյունը՝ Լոռին:
Դպրոցի տնօրենը մարզպետին տեղեկացրեց, որ երեխաների մի մասն այս օրերին բնակվում են ուսուցիչների տներում, մյուսներն էլ՝ դպրոցում սովորող աշակերտների ընտանիքներում: Նա նշեց նաև, որ համատեղ և միասնական ուժերով դպրոցն ամեն ինչ անում է, որ երեխաների ամեն օրը տպավորիչ և հիշարժան դառնա: Յուրաքանչյուր օրվա համար բովանդակալի օրակարգ է կազմվել. այցելություններ թանգարաններ, մարզի զբոսաշրջային տեսարժան վայրեր, պատմամշակութային կենտրոններ, կրթական հաստատություններ, սրճարաններ, այգիներ և այլն:
Հանդիպման ավարտին Վանաձորի թիվ 21 հիմնական դպրոցի տնօրենն իր աշակերտների պատրաստած շնորհակալագրով պարգևատրեց Լոռու մարզպետին և նրան հանձնեց դպրոցում գործող ինժեներական լաբորատորիայում ստեղծված հուշանվերները: