Տեղեկատվական կենտրոն
Նորություններ
«Խոսում են երիտասարդները» մեդիա նախագծի առաջին հարցազրույցը՝ Լոռու մարզպետի հետ
14.04.2023
![](http://lori.mtad.am/files/n_pics/34720_s.jpg)
«Երիտասարդական նախաձեռնությունների կենտրոն» հասարակական կազմակերպության ներկայացուցիչները «Խոսում են երիտասարդները» մեդիա նախագծի շրջանակներում այսօր հյուրընկալվել էին Լոռու մարզպետ Արամ Խաչատրյանի աշխատասենյակում:
Մեդիա նախագիծը մեկնարկել են 2023 թ. հունվարին՝ նպատակ ունենալով բարձրացնել երիտասարդների դերը հասարակության մեջ և դարձնել նրանց ձայնը լսելի՝ երիտասարդության խնդիրների ու երիտասարդական նախաձեռնությունների անաչառ լուսաբանման միջոցով։
Նրանք մարզի ղեկավարին տեղեկացրեցին, որ նախագծի շրջանակներում պատրաստվելու է մարզերի երիտասարդական նախաձեռնությունների, երիտասարդության հիմնահարցերի, առկա հնարավորությունների մասին պատմող հաղորդաշար, որը կրելու է «Խոսում են երիտասարդները» խորագիրը։ Առաջին մարզը, որտեղ այցելել են, Լոռին է և առաջին հանդիպումը Լոռու մարզպետի հետ է:
Լրագրության և երիտասարդական քաղաքականության ոլորտում վերապատրաստված երիտասարդները և նկարահանող խումբը Արամ Խաչատրյանի հետ անցկացրեցին հարցազրույց Լոռու մարզում երիտասարդությանն առնչվող հարցերի, նրանց նախաձեռնությունների և ձեռքբերումների, առկա խնդիրների վերաբերյալ:
Մարզպետը հարցազրույցի շրջանակներում նշեց, որ մարզի երիտասարդները բավականին ակտիվ են բոլոր բնագավառներում: Նրանք հանդես են գալիս տարբեր նախաձեռնություններում, ընդգրկվում են տարբեր գիտական, մշակութային, սպորտային, ժամանցային ծրագրերում: Նա ասաց, որ երիտասարդներից շատերը կամ իրենք են գլխավորում տարբեր հասարակական կազմակերպություններ կամ ամենաակտիվ ձևով ներգրավված են հասարակական կազմակերպություններում, հանդես են գալիս՝ որպես քաղհասարակության ակտիվ անդամներ և իրենց համայնքներում մասնակցում են տարբեր կարևոր հարցերի քննարկմանը, որոշումների կայացմանը:
-Ինձ շատ է ուրախացնում, որ մեր մարզի երիտասարդները ակտիվ մասնակցություն են ունենում գիտական մրցույթներում՝ մասնավորապես՝ նվիրված տեղեկատվական տեխնոլոգիաների ոլորտին, մաթեմատիկային, քիմիային, ֆիզիկային և գրանցում լուրջ հաջողություններ: Քիչ չեն մեր մարզի երիտասարդների ձեռքբերումները նաև սպորտի տարբեր ճյուղերում, երգի, պարի ասմունքի բնագավառներում և այլն,-ասաց նա:
Ա. Խաչատրյանը տեղեկացրեց, որ Լոռու մարզպետարանը նախաձեռնություն է ցուցաբերել ստեղծելու Լոռու մարզպետին կից երիտասարդական խորհուրդ: Գործընթացն ավարտական փուլում է:
-Վստահ եմ, խորհրդի կազմում ընդգրկված երիտասարդների հետ միասին կկարողանանք առավել ակտիվացնել, ավելի հետաքրքիր դարձնել մարզի երիտասարդների առօրյան, բազմաթիվ նախաձեռնություններ կյանքի կոչել,-ասաց նա:
Ինչ վերաբերում է խնդիրներին, նշեց, որ հատկապես փոքր համայնքներում երիտասարդների լիարժեք ժամանցի խնդիրն ամբողջությամբ լուծված չէ, սակայն կան գյուղական համայնքներ, որտեղ երիտասարդները շատ ակտիվ են և իրենք են նախաձեռնում իրենց ակտիվ ժամանցը, տարբեր ծրագրեր իրականացնում: Համայնքների ղեկավարները և մարզպետի աշխատակազմը հնարավորությունների սահմաններում փորձում են աջակցել նրանց: Առկա է նաև զբաղվածության խնդիր, սակայն այս ուղղությամբ ևս հետևողական աշխատանքներ են իրականացվում ամենաբարձր մակարդակով:
-Իմ կարծիքով, եթե երիտասարդը ձգտող է, խելացի և նախաձեռնող, ինքն անպայման կկարողանա հետաքրքիր դարձնել իր և շրջապատի առօրյան, ժամանակակից աշխարհը դրա համար տալիս է բոլոր հնարավորությունները,-իր խոսքը եզրափակեց մարզի ղեկավարը:
Նա նաև տեղեկացրեց, որ Լոռու մարզի երկու քաղաքներ՝ Ստեփանավանը՝ 2015թ.-ին, իսկ Վանաձորը՝ 2019թ.-ին ճանաչվել են «Երիտասարդական մայրաքաղաքներ»: Դրա արդյունքում այդ համայնքներում բազմաթիվ հետաքրքիր ծրագրեր են իրականացվել՝ հույս հայտնելով, որ մարզի մյուս համայնքներն էլ ակտիվ մասնակցություն կունենան այդ մրցույթին:
Խումբը հանդիպում ունեցավ նաև մարզպետի խորհրդական Տիգրան Հովսեփյանի հետ, ով կհամակարգի Լոռու մարզպետին կից երիտասարդական խորհրդի գործունեությունը: Տ. Հովսեփյանը ներկայացրեց խորհրդի շրջանակներում նախատեսվող ծրագրերը, կարևորեց «Երիտասարդական նախաձեռնությունների կենտրոն» հասարակական կազմակերպության հետ հետագա համագործակցությունը և փորձի փոխանակումը: