Տեղեկատվական կենտրոն
Նորություններ
Հրդեհից տուժած ընտանիքների խնդիրը Լոռու մարզպետարանի օրակարգում է
15.02.2023
![](http://lori.mtad.am/files/n_pics/34179_s.jpg)
Լոռու մարզպետ Արամ Խաչատրյանի հանձնարարությամբ մարզպետի տեղակալ Հովհաննես Ավետիսյանը հերթական հանդիպումն ունեցավ Փամբակ համայնքի Բազում բնակավայրում այս տարեսկզբին հրդեհի հետևանքով այրված փայտաշեն բազմաբնակարան շինության անօթևան մնացած յոթ ընտանքների ներկայացուցիչների հետ:
Հանդիպմանը ներկա էին նաև Փամբակ խոշորացված համայնքի ղեկավար Սուրեն Կոստանդյանը, Բազում բնակավայրի վարչական ղեկավար Արթուր Ծատուրյանը:
Հ. Ավետիսյանը տեղեկացրեց, որ շենքում բռնկված հրդեհի պատճառները պարզելու ուղղությամբ նախաքննություն է ընթանում, իրականացվում են մի շարք փորձաքննություններ: Նա նշեց, որ միայն վերջանական եզրակացության հիման վրա Լոռու մարզպետարանը կկարողանա կդիմել ՀՀ կառավարությանը՝ հրդեհից տուժած ընտանիքներին աջակցություն ցուցաբերելու խնդրանքով:
- Ձեր խնդրի լուծումը Լոռու մարզպետարանի ամենօրյա ուշադրության ներքո է, այդ հարցում կարող եք վստահ լինել,- ասաց Հ. Ավետիսյանը:
Հրդեհից տուժած ընտանիքներին առաջարկվեց կարճ ժամկետում բնակավայրի վարչական ղեկավարին, ըստ կարիքների առաջնահերթության, հանգամանալի ներկայացնել՝ ի՞նչ աջակցություն են ակնկալում:
Ս. Կոստանդյանը տեղեկացրեց, որ «Աստղիկ» բարեգործական հիմնադրամի հետ համագործակցության շրջանակներում ընտանիքները ներառվել են սննդի փաթեթների ձեռքբերման ծրագրում: Բազում բնակավայրի վարչական ղեկավարը դիմել է նաև տարբեր բարեգործական կազմակերպությունների, հիմնադրամների և բարերարների այս ընտանիքներին աջակցության տարբեր ծրագրերում ևս ներառելու համար:
Ընդգծելով, որ խնդրի վերջնական լուծումը տևական ժամանակ կպահանջի՝ Հ. Ավետիսյանը կրկին հիշեցրեց մարզի ղեկավարի առաջարկությունը՝ ընտանիքներին ժամանակավոր կացարանով ապահովելու վերաբերյալ: