Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Ծառայության մեկնեցին 2023 թ. մարզի առաջին նորակոչիկները
10.01.2023
Այսօր ՀՀ ՊՆ Լոռու մարզի զինվորական կոմիսարիատի Վանաձորի բաժանմունքից պարտադիր ժամկետային զինվորական ծառայության մեկնեցին ձմեռային զորակոչի առաջին նորակոչիկները: Միջոցառումը մեկնարկեց հանդիսավորությամբ: Ժամկետային զինծառայության մեկնող տղաներին ճանապարհելու էր գնացել մարզպետ Արամ Խաչատրյանը:
Ներկա էին նաև Վանաձորի համայնքապետի ժամանակավոր պաշտոնակատար Արկադի Փելեշյանը, Փամբակ համայնքի ղեկավար Սուրեն Կոստանդյանը, մարզային և համայնքային իշխանությունների ներկայացուցիչներ, նորակոչիկների հարազատները, ընկերները։
Մարզպետը տղաներին մաղթեց անփորձանք ծառայություն ու բարի վերադարձ հայրենի օջախներ:
- Վստա՛հ եմ՝ մեր բանակի շարքերը համալրելու եք մեկ կարևոր գիտակցումով՝ հայրենասիրությամբ ու հայ տղամարդուն վայել արժանապատվությամբ: Ծառայության ընթացքում զգոն ու աչալուրջ եղե՛ք, պահե՛ք անվտանգության կանոնները և, որ ամենակարևորն է, դժվարությունները հաղթահարեք միասի՛ն՝ ուս ուսի տված,-ասաց նա։
Նորակոչիկներին օրհնության ու բարեմաղթանքի խոսք հղեց Սուրբ Գրիգոր Նարեկացի եկեղեցու ավագ քահանա տեր Վահան Ազարյանը՝ իր աղոթքում խաղաղություն հայցելով մեր երկրի համար և անվտանգ ծառայություն՝ բոլոր զինվորների:
Վանաձոր և Փամբակ համայնքների ղեկավարների կողմից նորակոչիկներին հանձնվեցին հիգիենիկ պարագաների փաթեթներ:
