Լոռու մարզպետի աշխատակազմ

Լոռու մարզի Դսեղ, Դեբեդ, Եղեգնուտ, Վահագնի, Վահագնաձոր, Փամբակ, Վանաձոր բնակավայրերի բնակիչներն, ինչպես նաև Դսեղի առողջության և ՔՈԱՖ֊ ՍՄԱՐԹ կենտրոնների շահառուներն այսուհետ կտեղաշարժվեն նոր ու ժամանակակից ավտոբուսով:
Ծրագրի շնորհիվ Դսեղ֊Վանաձոր երթուղու վրա գտնվող 7 բնակավայրերի համար ստեղծվել է միջհամայնքային տրանսպորտային կապ։
Նոր ավտոբուսը Փամբակի համայնքապետարանին հանձնվեց ՔՈԱՖ֊ՍՄԱՐԹ կենտրոնում։ Ներկա էին Լոռու մարզպետի տեղակալ Հովհաննես Ավետիսյանը, Լոռու մարզպետի խորհրդական Տիգրան Հովսեփյանը, ՀՀ֊ում Ճապոնիայի արտակարգ և լիազոր դեսպան Ֆուկուշիմա Մասանորին, ՔՈԱՖ֊ՍՄԱՐԹ կենտրոնի տնօրեն Կորյուն Խաչատրյանը։
Լոռու փոխմարզպետ Հովհաննես Ավետիսյանը շնորհակալություն հայտնեց ծրագրի նախաձեռնողներին և իրականացնողներին՝ նշելով, որ նոր հասարակական տրանսպորտը վերոհիշյալ երթուղուց օգտվող բնակիչների համար հարմարավետ ծառայություններ կմատուցի, գյուղերի բնակիչներին նոր շուկաներ մուտք գործելու հնարավորություն կտա, մատչելի կդարձնի հաշմանդամություն ունեցող անձանց տեղաշարժը։
Միջոցառման ավարտին հյուրերը նոր ավտոբուսով ՍՄԱՐԹ կենտրոնից ուղևորվեցին Դեբետի վարչական շենք, որտեղ էլ ավտոբուսը հանձնվեց «Փամբակ» ՀՈԱԿ-ին։
Հիշեցնենք, որ Լոռու մարզի հասարակական տրանսպորտի ցանցի բարելավման նպատակով ՀՀ տարածքային կառավարման և ենթակառուցվածքների նախարարությունը, «Հայաստանի մանուկներ» բարեգործական հիմնադրամը (ՔՈԱՖ) և Ճապոնիայի դեսպանատունը մարտ ամսին ստորագրել էին համաձայնագիր՝ «Լոռու մարզի հասարակական տրանսպորտի համար ավտոբուսի տրամադրման» դրամաշնորհային ծրագրի իրականացման նպատակով: Ստորագրված համաձայնագրով՝ Ճապոնիայի դեսպանատունը տրամադրել էր ավելի քան 90.000 ԱՄՆ դոլար՝ նոր, հաշմանդություն ունեցող անձանց հարմարեցված ավտոբուսի գնման, տրանսպորտային ցանցի ընդլայնման և ենթակառուցվածքների բարեկարգման նպատակով։