Տեղեկատվական կենտրոն
Նորություններ
Քննարկվեցին մարզում գենդերային հիմնահարցերի մեղմման նպատակով իրականացվող ծրագրերը
01.07.2022
![](http://lori.mtad.am/files/n_pics/32348_s.jpg)
Լոռու մարզպետարանում անցկացվեց Լոռու մարզի գենդերային հարցերով զբաղվող մշտական գործող հանձնաժողովի նիստը, որը վարում էր Լոռու մարզպետի տեղակալ, հանձնաժողովի նախագահ Հովհաննես Ավետիսյանը: Նիստը հրավիրվել էր Լոռու մարզպետարանի ընտանիքի, կանանց և երեխաների իրավունքների պաշտպանության բաժնի նախաձեռնությամբ: Ներկա էին ՀՀ աշխատանքի և սոցիալական հարցերի նախարարության մարդկանց թրաֆիկինգի և կանանց հիմնահարցերի բաժնի պետ Էռնա Անտոնյանը, Լոռու մարզում գենդերային հարցերով զբաղվող և գործունեություն ծավալող ՀԿ-ների, Լոռու մարզպետարանի համապատասխան ստորաբաժանումների, Ոստիկանության Լոռու մարզային վարչության ներկայացուցիչներ, սոցիալական աշխատողներ:
Հ. Ավետիսյանը կարևորեց ներկաների դերակատարությունը՝ ոլորտում մեծ և հաջողված ծրագրեր իրականացնելու գործում և շնորհակալություն հայտնեց նրանց մարզում տարվող աշխատանքների համար:
Նիստի օրակարգային հարցերի շրջանակներում ներկայացվեցին Լոռու մարզում իրականացվող կանանց և տղամարդկանց իրավահավասարության քաղաքականությանն ուղղված ծրագրերը, ընտանեկան բռնությունների դեմ պայքարի ուղղությամբ տարվող գործընթացները, ծնողավարության հետ կապված՝ մարզում առկա խնդրահարույց հիմնահարցերի հաղթահարման ուղիները:
Մասնավորապես, անդրադարձ եղավ տեղական «Վիննեթ Վանաձոր» կանանց և երիտասարդների զարգացման ՀԿ-ի կողմից իրականացվող «Ապագան այսօր. կանանց, երիտասարդների և երեխաների հզորացում Հայաստանում ժողովրդավարության խորացման համար», Գյումրու «Երիտասարդական նախաձեռնությունների կենտրոն» ՀԿ-ի և ՄԱԿ-ի Բնակչության հիմնադրամի կողմից՝ Եվրոպական միության ֆինանսավորմամբ իրականացվող «ԵՄ-ն հանուն կանանց և տղամարդկանց իրավահավասարության» եռամյա տարածաշրջանային և Երիտասարդների լիդերության դպրոցի «Նախաձեռնողական մասնակցությունը ժողովրդավարության կայացմանը. թափանցիկ կառավարում տեղական մակարդակում» ծրագրերին:
Ամփոփելով նիստը՝ ներկաները քննարկեցին համագործակցության ընդլայնման հարցեր և պատրաստակամություն հայտնեցին գնահատել միմյանց ռեսուրսները՝ օգտակար և նպատակային գործելու համար: