Լոռու մարզպետի աշխատակազմ

Լոռու մարզպետի տեղակալ Հովհաննես Ավետիսյանն այսօր ընդունեց ՀՀ առողջապահութան նախարարի տեղակալ Արմեն Նազարյանին, Առողջապահական ծրագրերի իրականացման գրասենյակի տնօրեն Երվանդ Էլիբեկյանին: Հանդիպման նպատակն էր ներկայացնել Լոռու մարզում շուրջ մեկուկես տարի տևած մամոգրաֆիայի ազգային ծրագրի արդյունքները և խրախուսել այս գործում բարձր կատարողական ցուցանիշ ապահովող ԱԱՊ օղակի բուժհաստատություններին:
Հանդիպմանը ներկա էին Լոռու մարզպետարանի առողջապահության և սոցիալական ապահովության վարչության պետ Ռուզաննա Պողոսյանը, վարչության պատասխանատու մասնագետներ, մարզային բուժհաստատությունների ղեկավարներ:
Ողջունելով ներկաներին՝ փոխմարզպետը կարևորեց ծրագրի իրականացումը՝ նշելով, որ այն բարեհաջող և կանխարգելիչ դեր է ունեցել մարզում: Հ. Ավետիսյանը հորդորեց բուժհիմնարկների ներկայացուցիչներին ակտիվորեն աշխատել բնակչության հետ, որպեսզի հետևողական և պատշաճ կատարվեն կանխարգելիչ բոլոր հետազոտությունները:
Ծրագրի արդյունքում հաջողվել է փրկել շուրջ 120 կնոջ կյանք, իսկ 9000 կանայք՝ անցնելով համապատասխան ստուգումներ համոզվել են, որ չունեն կրծքագեղձի քաղցկեղի հետ կապված առողջական խնդիրներ: 1.5 տարվա ընթացքում շարժական մամոգրաֆը տեղակայվել է Լոռու մարզի բոլոր քաղաքներում՝ սպասարկելով 50-69 տարեկան 10.110 կանանց: Ախտորոշումը հստակեցնելու նպատակով 846 կին ուղեգրվել է լրացուցիչ հետազոտությունների, 138 կնոջ (1.3%) մոտ կրծքագեղձի քաղցկեղի ախտորոշումը հաստատվել է, 121 հիվանդի տրամադրվել է մասնագիտացված բուժօգնություն:

Ա. Նազարյանը շնորհակալություն հայտնեց Լոռու մարզպետարանին ծրագրի իրականացմանն օժանդակալու հարցում, բուժհիմնարկներին՝ համավարակի պայմաններում կանանց ակտիվ ներգրավվածությունն ապահովելու համար և արձանագրեց, որ ծրագրի իրակացման և հետազոտության համար դիմելիության գործում մեծ ակտիվություն են ցուցաբերել Ճոճկանի բժշկական ամուլատորիան, Թումանյանի, Արևածագի, Աքորու առողջության առաջնային պահպանման կենտրոնները, Տաշիրի, Սպիտակի, Ալավերդու բժշկական կենտրոնները, Վանաձորի թիվ 5 պոլիկլինիկան:

Լոռու մարզի վերոհիշալ 8 բուժհաստատությունները ծրագրի իրագործման լավ արդյունքների համար նվեր ստացան համակարգիչներ և տպիչ սարքեր՝ «ԱրՄեդ» առողջապահական համակարգը ներդնելու և արդյունավետ աշխատելու համար:
Կողմերը կարևորեցի ծրագրի շարունակականության ապահովումը: