Լոռու մարզպետի աշխատակազմ

Դպրոցական առարկայական օլիմպիադաների հանրապետական փուլում մրցանակակիրների թվով մարզերի մեջ առաջատարը Լոռին է։ Այսօր նրանց նվիրված գեղեցիկ ու հանդիսավոր միջոցառում էր կազմակերպվել:
Լոռու մարզպետ Արամ Խաչատրյանի անունից շնորհակալագրեր հանձնվեցին մրցանակային տեղեր զբաղեցրած աշակերտներին, մրցանակակիր աշակերտներ պատրաստելու համար՝ նաև նրանց ուսուցիչներին։ Շնորհակալագրերը հանձնեցին Լոռու մարզպետի տեղակալներ Գոռ Ասրյանը և Հովհաննես Ավետիսյանը։
Գոռ Ասրյանը ողջույնի խոսքում իր և մարզի ղեկավարի անունից շնորհավորեց աշակերտներին մարզի պատիվը բարձր պահելու ու նաև Երեխաների պաշտպանության միջազգային օրվա կապակցությամբ։
- Սիրելի՛ երեխաներ, աշակերտնե՛ր, մեր վաղվա օրը դուք եք կերտելու․ ես մեծ հույս ունեմ, որ ավելացնելու եք ձեր գիտելիքների պաշարը՝ հանուն մեր հայրենիքի հզորացման։ Մենք էլ մեր ամենօրյա աշխատանքում անում և անելու ենք հնարավորը, որ դուք հաջողեք։ Իհարկե, այդ աշխատանքի մեծ բաժինը ձեր ուսուցիչներինն է։ Այս տարվա արդյունքն ապացույցն է այն բանի, որ նրանք ջանք ու եռանդ չեն խնայում ձեզ՝ որպես հայրենիքին արժանի զավակներ, կրթված և գիտակից քաղաքացիներ դաստիարակելու համար,- ասաց նա։
*Այս տարի Լոռու մարզից Դպրոցական առարկայական օլիմպադաների հանրապետական փուլին մասնակցության ուղեգրեր էին վաստակել մարզային փուլում հաջողություն գրանցած 129 աշակերտներ․ նրանցից մրցանակային տեղեր են զբաղեցրել 60-ը։ Նախորդ տարի հանրապետական փուլին մասնակցել էր 115 աշակերտ, մրցանակային տեղ զբաղեցրել՝ 52-ը։
Մարզի աշակերտներից հանրապետական փուլում առաջին կարգի դիպլոմի է արժանացել 4 աշակերտ, երկրորդ՝ 9, 3-րդ կարգի՝ 25 աշակերտ և 22 աշակերտ արժանացել է գովասանագրի։
Ամենաշատ մրցանակային տեղերը եղել են քիմիա և հայ եկեղեցու պատմություն առարկաներից՝ 9-ական աշակերտ, երկրորդ տեղում հայոց լեզու առարկան է՝ 7 աշակերտով։
Նախնական զինվորական պատրաստություն առարկայի օլիմպիադան անց է կացվել թիմային ձևաչափով (7 աշակերտ), մարզի թիմը գրավել է 3-րդ տեղը։
Առաջին տեղի մրցանակակիրներ ենք ունեցել նաև Հայ գրականություն և հայոց պատմություն առարկաներից։