Տեղեկատվական կենտրոն
Նորություններ
«Դուք սրբորեն ու անձնուրացաբար պահպանում եք մեր պատմության մասունքները, մշակույթի գանձերը». մարզի ղեկավարը հյուրընկալել էր թանգարանային գործի նվիրյալներին
27.05.2022
![](http://lori.mtad.am/files/n_pics/32000_s.jpg)
Լոռու մարզպետ Արամ Խաչատրյանն այսօր հյուրընկալել էր Լոռու մարզի թանգարանների մի խումբ աշխատակիցների՝ Թանգարանների օրվա առթիվ անձամբ շնորհավորելու և նրանց կատարած անձնվեր ու անշահախնդիր աշխատանքն արժևորելու նպատակով:
Թանգարանային արժեքների պահպանման, թանգարանների զարգացման և հանրահռչակման գործում ունեցած մեծ ներդրման համար Արամ Խաչատրյանը բարեմաթանքի և գնահատանքի ջերմ խոսքեր հղեց ու մարզպետի շնորհակալագրերով պարգևատրեց Ալավերդու Միկոյան եղբայրների տուն-թանգարանի տնօրեն Հայկանուշ Աղբալյանին, Ստեփանավանի Ստեփան Շահումյանի տուն-թանգարանի թանգարանային բաժնի վարիչ Տաթևիկ Գագինյանին, ֆոնդապահ Անահիտ Սարգսյանին, Դսեղի Հովհաննես Թումանյանի տուն-թանգարանի ֆոնդապահ Վերիչկա Աղաջանյանին, Վանաձորի Ստեփան Զորյանի տուն-թանգարանի փոխտնօրեն Ջիվան Սարգսյանին, Լոռի-Փամբակի երկրագիտական թանգարանի գրադարանավար Գայանե Հարությունյանին, Կառլոս Աբովյանի անվան կերպարվեստի թանգարանի հսկիչ Գայանե Գևորգյանին:
- Դուք սրբորեն ու անձնուրացաբար եք կատարում ձեզ վերապահված պարտավորությունները, պահպանում եք մեր պատմության մասունքները, մշակույթի գանձերը և դրանք անձեռնմխելի կերպով փոխանցում գալիք սերունդներին: Հայաստանը, այդ թվում և Լոռու մարզը թանգարանների պակաս չի զգում: Թանգարանները վկայություններ են մեր հարուստ պատմության, դարավոր ու անկրկնելի մշակույթի մասին,-ասաց Ա. Խաչատրյանը:
Շնորհավորանքի խոսքեր հնչեցրեցին նաև մարզպետարանի կրթության, մշակույթի և սպորտի վարչության պետ Արամ Գրիգորյանը, մշակույթի և սպորտի բաժնի պետ Արամ Ռևազյանը:
Շնորհակալություն հայտնելով իրենց աշխատանքը բարձր գնահատականի արժանացնելու համար՝ թանգարանային գործի նվիրյալները մարզի ղեկավարին հրավիրեցին աշխատակազմով առաջիկա օրերին այցելել իրենց հյուրընկալ օջախներ, ինչն էլ արժանացավ Ա. Խաչատրյանի հավանությանը: