Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Չնայած չդադարող մաքրման աշխատանքներին՝ Լոռու մարզում դեռևս կան դժվարանցանելի ճանապարհներ
21.03.2022
Լոռու մարզում այսօր ևս շարունակվում են միջպետական, հանրապետական, մարզային և համայնքային նշանակության ճանապարհների մաքրման աշխատանքները։ Սպասարկող ընկերություններն աշխատում են արտակարգ ռեժիմով, սակայն առատ ձյան պատճառով մարզում դեռ կան փակ և դժվարանցանելի ճանապարհներ, որոշ հատվածներում առկա է նաև մերկասառույց։
Լոռու մարզպետ Արամ Խաչատրյանի գլխավորությամբ, արդեն 3-րդ օրն է փոխմարզպետներ Գոռ Ասրյանը, Հովհաննես Ավետիսյանը, մարզպետարանի պատասխանատու այլ պաշտոնյաներ, համայնքների ղեկավարներ, «Ճանապարհային դեպարտամենտ» հիմնադրամի, ԱԻՆ փրկարար ծառայության Լոռու մարզի փրկարարական վարչության, ոստիկանության Լոռու մարզային վարչության և Ճանապարհային ոստիկանության ծառայողներ, հսկում և աջակցում են ճանապարհների երթևեկելի հատվածների ձյան մաքրման և աղ- ավազով մշակման աշխատանքներին, օգնում վարորդներին դուրս գալ խցանումներից և արգելափակումից։
Այս պահին «Ճանապարհային դեպարտամենտ» հիմնադրամը տեղեկացնում է, որ Մ-8 միջպետական նշանակության Վանաձոր-Դիլիջան և Մ-6 միջպետական նշանակության Վանաձոր-Թումանյան ավտոճանապարհները կցորդով տրանսպորտային միջոցների համար փակ են, իսկ մյուս տեսակի տրանսպորտային միջոցների համար՝ դժվարանցանելի (անվաշղթաների կիրառման դեպքում):
Հարգելի՛ քաղաքացիներ, խնդրում ենք երթևեկել միայն խիստ անհրաժեշտության դեպքում, ձմեռային անվադողերով և խստագույնս պահպանել ճանապարհային երթևեկության, անվտանգության բոլոր կանոնները:
