Տեղեկատվական կենտրոն
Նորություններ
Մարզի ղեկավարը Վանաձորի համայնքապետարանի աշխատակազմին ներկայացրեց համայնքի ղեկավարի ժամանակավոր պաշտոնակատար Վանիկ Օհանյանին
12.10.2021
![](http://lori.mtad.am/files/n_pics/29974_s.jpg)
Լոռու մարզպետ Արամ Խաչատրյանն այսօր Վանաձորի համայնքապետարանի աշխատակազմին ներկայացրեց Վանաձոր համայնքի ղեկավարի ժամանակավոր պաշտոնակատար Վանիկ Օհանյանին:
Ինչպես հայտնի է, ՀՀ վարչապետ Նիկոլ Փաշինյանի հոկտեմբերի 12-ի թիվ 1148-Ա որոշմամբ Վանիկ Օհանյանը նշանակվել է Վանաձոր համայնքի ղեկավարի ժամանակավոր պաշտոնակատար:
Մարզպետ Ա. Խաչատրյանը շնորհավորեց Վ. Օհանյանին պաշտոնը ստանձնելու կապակցությամբ՝ մաղթելով աշխատանքային հաջողություններ: Նա հույս հայտնեց, որ պաշտոնավարման ժամանակահատվածում Վ. Օհանյանը պատվով և պատասխանատվությամբ կկատարի իրեն վստահված աշխատանքը, հատկապես այնպիսի բարդ շրջափուլում, ինչպիսին առաջիկայում սպասվող համայնքների խոշորացման գործընթացն է և Վանաձոր համայնքի ավագանու ընտրությունները: Մարզի ղեկավարը ևս մեկ անգամ բարձրաձայնեց կայացված որոշման մասին. Վանիկ Օհանյանը Վանաձոր խոշորացված համայնքի ավագանու ընտրություններում չի հանդիսանա Քաղաքացիական պայմանագիր կուսակցության քաղաքապետի թեկնածուն՝ հնարավոր շահարկումներից խուսափելու համար:
Մարզպետ Ա. Խաչատրյանը նաև շնորհակալություն հայտնեց Մամիկոն Ասլանյանին՝ որպես համայնքի ղեկավար պաշտոնավարման ընթացքում կատարած աշխատանքի համար:
Վանաձորի համայնքապետարանի գլխավոր քարտուղար Արթուր Օհանյանը համայնքային ծառայողներին կոչ արեց աշխատանքում լինել առավել պատասխանատու:
Վ. Օհանյանն իր հերթին շնորհակալություն հայտնեց վստահության համար և նշեց.
-Պատրաստակամ եմ այս փուլում առավելագույն ջանքեր գործադրել, որպեսզի չխաթարվի համայնքապետարանի բնականոն գործունեությունը: Այսօր ևս համախմբման կոչ եմ անում` վստահ լինելով, որ միայն այդպես կկարողանանք լուծել բոլոր խնդիրները,-ասաց նա: