Տեղեկատվական կենտրոն
Նորություններ
Խոնարհվու՛մ ենք ձեր առջև, սիրու՛մ ենք ձեզ, սիրելի՛ ուսուցիչներ
05.10.2021
![](http://lori.mtad.am/files/n_pics/29901_s.jpg)
Լոռու մարզպետարանը՝ մարզպետ Արամ Խաչատրյանի գլխավորությամբ զորյանական հյուրընկալ հարկի տակ էր հավաքել շուրջ 60 մանկավարժի մարզի բոլոր տարածաշրջաններից՝ ջերմ մթնոլորտում ևս մեկ անգամ նրանց ուղղված մեծարանքի խոսքեր հնչեցնելու, հոտնկայս ծափահարելու և ասելու. սիրելի՛ ուսուցիչներ, մենք չափազանց բարձր ենք գնահատում ձեր վաստակը, պարտական ենք ձեզ կրթված, հայրենասեր սերունդներ ունենալու համար:
Խոնարհվու՛մ ենք ձեր առջև, սիրու՛մ ենք ձեզ:
Օրվա առթիվ ողջույնի խոսքով հանդես եկավ Վանաձորի Ստեփան Զորյանի անվան տուն-թանգարանի տնօրեն Լիլիթ Չոբանյանը՝ շնորհակալություն հայտնելով նման գեղեցիկ ու խորհրդանշական միջոցառման անցկացման նպատակով մեծ գրողի տունն ընտրելու համար: Միանալով տոնի առթիվ հնչող շնորհավորանքներին՝ նա ուսուցիչներին մաղթեց քաջ առողջություն և ամենայն բարիք:
Մարզպետ Արամ Խաչատրյանն իր շնորհավորանքի խոսքում բարձր գնահատեց մանկավարժների դերը սերունդների կրթության ու դաստիարակության գործում.
- Դուք օգնում եք մատաղ սերնդին առաջին քայլերն անել կյանքում և դառնալ լավ մարդ ու քաղաքացի՝ դրանով իսկ ստանձնելով հայրենանվեր ու ազգանպաստ առաքելություն: Մեզնից յուրաքանչյուրը մեծագույն սիրով է հիշում իր առաջին ուսուցչին, անպայման ունեցել է նաև սիրելի ուսուցիչներ ու ամբողջ կյանքի ընթացքում վառ է պահում նրանց մասին ու դպրոցական տարիների հետ կապված հիշողությունները: Այդ հիշողությունները ջերմացնում են մեր հոգիները և իրենց ուրույն հետքը թողնում մեր հետագա գործունեության վրա,-ասաց մարզի ղեկավարը: Նա շնորհավորագրեր ու ծաղկեփնջեր հանձնեց սիրելի մանկավարժներին:
Նրանք էլ իրենց հերթին շնորհակալություն հայտնեցին ջերմ վերաբերմունքի և ուշադրության համար՝ փոխադարձաբար մաղթելով ու երկրի սահմանները այլևս միշտ խաղաղ լինեն, որ իրենց սաները, զավակները, հայրենիքի սահմանների պաշտպանության սուրբ գործն իրականացնելով, տուն դառնան ողջ և առողջ ու նվաճեն միմիայն գիտության բարձունքները:
Ուսուցիչներին նվիրված երգերի կատարումներով հանդես եկավ Անի Տիրացույանը, ասմունքով՝ Ջիվան Սարգսյանը և Վանաձորի պոեզիայի թատրոնի սաները: