Լոռու մարզպետի աշխատակազմ

Այսօր Լոռու մարզպետ Արամ Խաչատրյանն անցկացրեց աշխատանքային խորհրդակցություն փոխմարզպետ Գոռ Ասրյանի, մարզպետարանի գլխավոր քարտուղար Կամո Աշրաֆյանի, կառուցվածքային ստորաբաժանումների ղեկավարների և այլ պատասխանատու պաշտոնյաների մասնակցությամբ:
Մինչ օրակարգային հարցերին անցնելը՝ մարզի ղեկավարը ներկայացրեց քաղաքացիական ծառայության թափուր հաստիքների համար հայտարարված մրցույթներում հաղթող ճանաչված և համապատասխան պաշտոններում նշանակված աշխատակիցներին՝ մաղթելով բեղմնավոր գործունեություն. մասնավորապես մարզպետարանի գլխավոր քարտուղարի տեղակալի պաշտոնում նշանակվել է Հեղինե Հալիվորյանը (http://lori.mtad.am/structure/bio/936/), Ընտանիքի, կանանց և երեխաների իրավունքների պաշտպանության բաժնի պետ է նշանակվել Իրինա Մարտիրոսյանը (http://lori.mtad.am/structure/bio/924/), Ֆինանսական և սոցիալ-տնտեսական զարգացման վարչության պետ՝ Մերի Դալլաքյանը:
Խորհրդակցության ընթացքում մարզպետարանի կառուցվածքային ստորաբաժանումների ղեկավարները, ըստ ոլորտների, ամփոփ կերպով ներկայացրեցին ընթացիկ աշխատանքները, առկա խնդիրները և հանդես եկան մի շարք առաջարկություններով:
Մասնավորապես, մարզի ղեկավարին ներկայացվեց պետություն-համայնք համատեղ ներդրմամբ մարզում իրականացվող սուբվենցիոն ծրագրերի ընթացքը. ներկա պահին միջգերատեսչական հանձնաժողովին ներկայացված 115 ծրագրերից հաստատված են 111-ը: Դրանցից 11 ծրագիր արդեն ավարտվել է, 71 ծրագրի շինարարական աշխատանքներն ընթացքի մեջ են, 21 ծրագրի շինարարական աշխատանքները դեռևս չեն սկսվել, 8 ծրագիր պայմանագրի կնքման ընթացքում է:
Մարզի համայնքներում շարունակվում է նաև սեփական եկամուտների հավաքագրման գործընթացը: Սեպտեմբերի 27-ի դրությամբ սեփական եկամուտների կատարողականը պլանի դիմաց կազմել է 90 տոկոս, նախորդ տարվա համեմատությամբ՝ 110:
Ա. Խաչատրյանի խիստ հանձնարարականն է՝ հետևողականություն ցուցաբերել թերացող համայնքների նկատմամբ և ցուցանիշները հասցնել 100 տոկոսի:
Առողջապահության ոլորտում շարունակվում է պատվաստումների իրականացման գործընթացը. սեպտեմբերի 27-ի դրությամբ մարզում պատվաստվել է 27.436 մարդ կամ բնակչության 11 տոկոսը: Մարզի ղեկավարը հորդորեց՝ ըստ ոլորտների հետևողական լինել գործընթացը պատշաճ իրականացնելու նպատակով: Ներկայացվեցին նաև համավարակի տարածման ցուցանիշները. մինչ օրս Քովիդ 19-ով վարակվածների ընդհանուր թիվը մարզում կազմում է 14.502, առողջացածներինը՝ 13.715, ներկա պահին բուժում է ստանում 474 հիվանդ, մահերի ընդհանուր թիվը՝ 313 է:
Ներկայացվեցին նաև արտաքին կապերի և զարգացման ծրագրերի, գյուղատնտեսության, երեխաների իրավունքների պաշտպանության, հողաշինության, կրթության և մյուս այլ ոլորտներում իրականացված աշխատանքները:
Մարզի ղեկավարը հանդես եկավ մի շարք հանձնարարականներով՝ հորդորելով դրանք իրականացնել ամենասեղմ ժամկետներում: