Լոռու մարզպետի աշխատակազմ

 Լոռու մարզպետ Արամ Խաչատրյանն ընդունեց և շնորհակալագրեր, պատվոգրեր ու դրամական պարգևներ հանձնեց օգոստոսի 12-20-ը Բոսնիա և Հերցոգովինայի մայրաքաղաք Սարաևոյում կայացած՝ կրտսեր տարիքի պատանիների Հայաստանի բռնցքամարտի Եվրոպայի առաջնության հաղթողներին, նրանց մարզիչներին, նաև «Սպիտակի մանկապատանեկան համալիր մարզադպրոց» ՊՈԱԿ-ի սան Անուշավան Մխիթարյանին (մարզիչ Գառնիկ Պապիկյան) բռնցքամարտի երիտասարդների առաջնությունում պատվավոր առաջին տեղ գրավելու համար:
Եվրոպայի կրտսեր տարիքի պատանիների առաջնությունից Լոռու մարզի պատանի բռնցքամարտիկները 3 մեդալով են վերադարձել:

- Ես վստահ եմ, որ Ձեր մեծ հաղթանակները դեռ առջևում են, այդ ձեռքբերումները յուրաքանչյուրինս են, դրանք ոգևորող են և օրինակելի: Մարզային իշխանությունները ձեր կողքին են, շարունակեք նոր ռեկորդներ սահմանել: Ձեզ հաջողություններ եմ մաղթում,- ասաց Լոռու մարզպետը:

Եվրոպայի առաջնությունում պատվավոր երկրորդ տեղ զբաղեցնելու համար պարգևատրվեցին Վանաձորի օլիմպիական հերթափոխի մենապայքարային մարզաձևերի մարզադպրոցի սան Արգիշտի Հակոբյանը (մարզիչ Գևորգ Կոստանյան), Վանաձորի բռնցքամարտի մանկապատանեկան մարզադպրոցի սան Վազգեն Քարհանյանը (մարզիչ Արմեն Պապիկյան) և նույն դպրոցի պատանի բռնցքամարտիկ Հեղինե Պետրոսյանը (մարզիչ Գառնիկ Պապիկյան) կրտսեր տարիքի պատանիների առաջնությունում երրորդ տեղ զբաղեցնելու համար:

Շնորհակալագրեր և դրամական պարգևներ ստացան նաև չեմպիոնների մարզիչները առաջնությունում մրցանակակիր սան պատրաստելու համար: Նրանք իրենց խոսքում նշեցին, որ մարզային իշխանությունների ուշադրությունը ոլորտի նկատմամբ պարտավորեցնող է, և կանեն առավելագույնը մարզի և ողջ հանրապետության պատիվը տարբեր մրցաշարերում բարձր պահելու համար: