Լոռու մարզպետի աշխատակազմ

Լոռու մարզի Դարպաս համայնքում գործող «ՌՍՎ» հայ-իրանական կոմպոզիտային բալոնների (գազաբալոնների) արտադրության գործարանն առաջին խոշոր խմբաքանակը առաջիկա 2 օրերին կուղարկի Մոսկվա: Ռուսական խոշոր ընկերություններից մեկի հետ կնքված պայմանագրի համաձայն՝ արտահանումները այսուհետ կկրեն պարբերական բնույթ՝ ապահովելով գազաբալոնների նույն խմբաքանակով արտահանումն ամսական մեկ անգամ:
Լոռու մարզպետը այսօր այցելեց գործարան: Համասեփականատեր Արայիկ Ասրյանի ուղեկցությամբ մարզպետը շրջեց արտադրության տարածքում, ծանոթացավ աշխատանքների կազմակերպմանն ու արտադրության ծավալների տեմպին: Արայիկ Ասրյանի ներկայացմամբ՝ համավարակով և պատերազմով պայմանավորված՝ երկար ժամանակ մեծ ծավալով աշխատելու հնարավորություն չունեին, սկզբնական շրջանում աշխատակիցների թիվը զգալի պակասել էր, սակայն այսօր տեմպը փորձում են վերականգնել և նոր թափ հաղորդել գործարանի աշխատանքին: Այս պահին շուրջ 15 աշխատակից ունեն, որոնց թիվը, ինչպես մարզպետին վստահեցրեց Արայիկ Ասրյանը, մինչև սեպտեմբեր ամիս կդարձնեն 40 և ավելի:
Մարզի ղեկավարը հույս հայտնեց, որ գործարանը կկարողանա սպասելիքներն արդարացնել և՛ աշխատակիցների թվի, և՛ արտադրության ծավալների ավելացման առումով:
-ՀՀ կառավարության և Լոռու մարզպետարանի որդեգրած քաղաքականությունն է աջակցել բոլոր այն ներդումային ծրագրերին, որոնք կնպաստեն մարզի զարգացմանը, նոր աշխատատեղեր հիմնելու հնարավորություն կընձեռեն,-ասաց Ա. Խաչատրյանը:
Գործարանում արտադրվում են հեղուկ և բնական գազերի համար նախատեսված գազաբալոններ, հումքը ներկրվում է արտասահմանից, օգտագործում են ապակու և կարբոնի մանրաթել: Մետաղական բալոնների համեմատ՝ դրանք մի քանի անգամ ավելի թեթև են և պայթյունավտանգ չեն: Համասեփականատիրոջ խոսքով՝ առավելագույն լարվածությամբ աշխատելու դեպքում ամսական կկարողանան արտահանել մինչև 3000 խմբաքանակ:
Շուկայում այս պահին փոքր տեղ են զբաղեցնում, սակայն սարքավորումների և մարդկային ռեսուրսների ավելացումը թույլ կտա արտադրողականությունը, հետևապես նաև՝ սպառման շուկան մեծացնել: Քիչ քանակությամբ արտադրում են նաև մեթանի, թթվածնի, պրոպանի համար նախատեսված բալոններ, բայց այս պահին պայմանագրային պարտավորություն ունեն և առաջնությունը տվել են կենցաղային գազաբալոններին: