Լոռու մարզպետի աշխատակազմ

Լոռու մարզպետի տեղակալ Գոռ Ասրյանը, մարզպետարանի մի խումբ պաշտոնյաների ուղեկցությամբ, աշխատանքային այցով եղավ Թումանյան խոշորացված համայնքի Քարինջ, Մարց, Լորուտ, Շամուտ, Աթան և Ահնիձոր բնակավայրերում՝ հանդիպումներ ունենալով ակտիվ բնակիչների հետ, հաղորդակից դառնալով բնակավայրերում առաջնային լուծում պահանջող խնդիրներին:
Ամենագլխավոր խնդիրը, որը մտահոգում է բնակիչներին ճանապարհի հիմնանորոգման անհրաժեշտությունն է, որով պայմանավորված էլ՝ այլ շղթայական խնդիրներ են առաջանում՝ կապված տրանսպորտային միջոցների չգործելու, կաթնամթերքի, մսամթերքի, այլ բնամթերքի իրացման դժվարությունների և այլն: Փոխմարզպետը տեղեկացրեց, որ Տարածքային կառավարման և ենթակառուցվածքների նախարար Սուրեն Պապիկյանի հետ մարզպետ Արամ Խաչատրյանը նախնական համաձայնություն է ձեռքբերել այս տարի Հ 70՝ Մ6-Աթան շուրջ 34 կմ ճանապարհահատվածի հիմնանորոգման աշխատանքների կազմակերպման շուրջ:
Փոխմարզպետն իր խոսքում կարևորեց նաև սեփական եկամուտների հավաքագրման պատշաճ իրականացման անհրաժեշտությունը, ինչը համայնքներին հնարավորություն կընձեռի ակտիվորեն մասնակցել պետություն-համայնք համատեղ ներդրմամբ իրականացվող սուբվենցիոն ծրագրերին և լուծում տալ ընթացիկ խնդիրներին:
Հանդիպման ընթաքում բարձրացվեցին մի շարք այլ հարցեր, որոնց լուծումներ կտրվեն օրենքով սահմանված կարգով: