Տեղեկատվական կենտրոն
Նորություններ
Ճանաչողական այցով Լոռու մարզում էր Գյումրիում Ռուսաստանի Դաշնության գլխավոր հյուպատոս Ռուսլան Կանդաուրով
24.03.2021
![](http://lori.mtad.am/files/n_pics/28153_s.jpg)
Այսօր Լոռու մարզպետ Արամ Խաչատրյանը հյուրընկալեց ճանաչողական այցով մարզ ժամանած Գյումրիում Ռուսաստանի Դաշնության գլխավոր հյուպատոս Ռուսլան Կանդաուրովին, ինչպես նաև Գյումրիում Ռուսաստանի գիտության և մշակույթի կենտրոնի տնօրեն Հարություն Համբարձումյանին:
Հանդիպմանը ներկա էին նաև Լոռու մարզպետի տեղակալ Գոռ Ասրյանը և խորհրդական Արմեն Հարությունյանը:
Մարզի ղեկավարը շնորհավորեց հյուպատոսին կարևոր և պատասխանատու պաշտոնը ստանձնելու կապակցությամբ և հույս հայտնեց, որ համագործակցությունը երկու կառույցների միջև կշարունակվի՝ հնարավորություն տալով համատեղ իրականացնելու ավելի շատ ծրագրեր: Մարզի ղեկավարն իր խոսքում ընդգծեց հատկապես հայ և ռուս ժողովուրդների դարավոր բարեկամությունը:
Հյուրերին ուղղված ողջույնի խոսքով հանդես եկան և ռուս-հայկական բարեկամությունը կարևորեցին նաև Գ. Ասրյանը և Ա. Հարությունյանը:
Հյուպատոսն, իր հերթին շնորհակալություն հայտնելով ջերմ ընդունելության համար, նույնպես սերտ համագործակցության պատրաստակամություն հայտնեց: Նա իր խոսքում նշեց, որ թեև 4 ամիս է, ինչ պաշտոնավարում է, բայց հայ ժողովրդի հետ բարեկամության հիմքերը դրվել են դեռևս հեռավոր 1988թ.-ին, երբ, ի թիվս շատ ռուս մասնագետների, ինքը ևս օգնության է շտապել ծանր իրավիճակում հայտնված աղետի գոտու բնակիչներին:
Ռ. Կանդաուրովը համառոտ անդրադարձավ նաև Լոռու մարզում ՌԴ կառավարության աջակցությամբ իրականացվող ծրագրերին և վստահեցրեց, որ դրանք տարեցտարի ընդլայնվելու միտում ունեն:
Գյումրիում Ռուսաստանի գիտության և մշակույթի կենտրոնի տնօրեն Հարություն Համբարձումյանն իր հերթին ներկայացրեց ՌԴ կառավարության աջակցությամբ կենտրոնի կողմից իրականացվող ծրագրերը: Նա մասնավորապես անդրադարձավ ՌԴ սոցիալ-մշակութային նախաձեռնությունների հիմնադրամի նախաձեռնությամբ 2013թ-ից իրականացվող «Տաք սիրտ» ակցիային, որի նպատակն է բացահայտել, աշխարհին ներկայացնել մինչև 23 տարեկան այն երեխաներին, պատանիներին ու երիտասարդներին, ովքեր կյանքի գնով, հերոսական արարքներ իրականացնելով՝ օգտակար են եղել դրա կարիքն ունեցող մարդկանց: 2020թ.-ին Լոռու մարզում այդպիսի 3 դպրոցական ենք ունեցել և հյուպատոսի այցը Լոռու մարզ նաև նրանց ներկայացնելու և մրցանակները հանձնելու նպատակ ուներ:
Հյուրերը շնորհավորեցին և մրցանակները հանձնեցին «Տաք սիրտ» մրցանակին արժանացած վանաձորցի դպրոցականներ Տիգրան Մարկոսյանին, Էդմոն Քոչարյանին և Էդիկ Ղարաքեշիշյանին: Մարզպետ Արամ Խաչատրյանն իր հերթին, շնորհավորելով երեխաներին, մաղթեց հաջողություններ ուսման մեջ և կյանքում՝ վստահություն հայտնելով, որ նրանք առաջին հերթին լավ մարդ կմեծանան:
Մարզի ղեկավարը և հյուրերը եղան նաև Վանաձորի պետական համալսարանում, պատվիրակությունը շրջայց կատարեց համալսարանի ֆակուլտետներում, եղավ գրադարանում և ռուսաց լեզվի ամբիոնում, լսարաններում, իսկ հանդիպման ավարտին Գյումրիում Ռուսաստանի գիտության և մշակույթի կենտրոնի և համալսարանի միջև համագործակցության հուշագիր ստորագրվեց: