Տեղեկատվական կենտրոն
Նորություններ
Դպրոցական գույքը կնվիրաբերվի Լոռու մարզի գյուղական համայնքների դպրոցներին
19.03.2021
![](http://lori.mtad.am/files/n_pics/28114_s.jpg)
Լոռու մարզպետ Արամ Խաչատրյանն այսօր ընդունեց սփյուռքահայ բարերար Տավրոս Ասլանյանին՝ իր երախտագիտությունը հայտնելու նրան Լոռու մարզում իրականացված բարեգործական ծրագրերի համար: Հանդիպմանը ներկա էր նաև մարզպետի տեղակալ Գոռ Ասրյանը:
Արմատներով վանաձորցի, Գերմանիայում ծնված Տավրոս Ասլանյանն, ով բնակվում է Հոլանդիայի Ամստելվին քաղաքում, իր և ընկերների՝ Հոլանդիայում բնակվող գյումրեցի Սամվել Սուքիասյանի, թուրքահայ Վիգեն Տոքերի նախաձեռնությամբ բարեգործական առաքելությամբ է ժամանել հայրենիք: Բարեգործները 6 մեծ կոնտեյներներով դպրոցական գույք (նստարաններ, ուսուցչական գրասեղաններ, սեղաններ, աթոռներ, գրատախտակներ, պահարաններ, մարզադահլիճի համար նախատեսված գույք), ինչպես նաև համակարգիչներ են բերել Հայաստան: Նպատակը՝ ամբողջ գույքը նվիրաբերել Լոռու, Շիրակի, Տավուշի, Սյունիքի մարզերի առավել կարիքի մեջ գտնվող շուրջ 20 դպրոցի: Բավականին մեծածավալ և արժեքավոր դպրոցական գույքը կնվիրաբերվի մասնավորապես Լոռու մարզի 8-9 գյուղական համայնքերի դպրոցների:
Ա. Խաչատրյանն իր խոսքում նշեց, որ, որպես մարզի ղեկավար, բարձր է գնահատում հայ բարերարների՝ հայրենիքին օգնելու պատրաստակամությունը և վստահեցրեց, որ Լոռու մարզպետարանը պատրաստ է աջակցելու բոլոր ողջունելի նախաձեռնություններին:
Տ. Ասլանյանն իր հերթին շնորհակալություն հայտնեց սերտ համագործակցության և ջերմ ընդունելության համար: Նա վստահեցրեց, որ նմանատիպ բարեգործական ծրագրերը շարունակական բնույթ կկրեն: