Լոռու մարզպետի աշխատակազմ

  Լոռու մարզի Աքորի գյուղի միջնակարգ դպրոցի դասասենյակներից մեկն անվանակոչվեց նույն դպրոցի շրջանավարտ, Հադրութի շրջանի Մեխակավանի պաշտպանական մարտերում զոհված Վախթանգ Օհանյանի անունով: Միջոցառմանը մասնակցում էին Լոռու մարզպետի տեղակալ Գոռ Ասրյանը, Ալավերդի խոշորացված համայնքի ղեկավար Սասուն Խեչումյանը, Վախթանգի ծնողները, զինվորականներ, մանկավարժական կոլեկտիվն ու աշակերտները, հյուրեր: Դասասենյակում՝ հերոսին նվիրված անկյունում, ցուցադրված էին Վախթանգ Օհանյանի անձնական իրերն ու լուսանկարները: Դպրոցի տնօրենը, ուսուցիչները ներկայացրին Վախթանգի կյանքի ուղին, իսկ հերոսի մարտական ընկերները պատմում էին դիպվածներ՝ մարտի դաշտից:
-Վախթանգը իր սխրանքով վաստակել է անմահության իրավունքը. նա և նրա նման հերոսացած տղաները մշտապես լինելու են մեր օրվա մի մասնկիը: Նրանք անցյալ չեն, նրանք հավերժ ներկա են ու ապագա սերունդների համար ուժի ու հերոսության լավագույն օրինակ են լինելու,- իր խոսքում նշեց մարզպետի տեղակալ Գոռ Ասրյանը:
Աշակերտները հանդես եկան հայրենասիրական երգերի կատարմամբ ու ասմունքով, փոքրիկներն այսօր արդեն խոստանում են՝ շարունակելու են հերոս հայորդու կիսատ թողած գործը, հայրենիքի սահմանների պաշտպանությունը կատարելու են մեծ պատասխանատվությամբ ու անձնվիրաբար: