Լոռու մարզպետի աշխատակազմ

Լոռու մարզպետ Արամ Խաչատրյանն այսօր իր աշխատասենյակում հյուրընկալել էր
«Էյ-Թի-Փի» բարեգործական հիմնադրամի անտառվերականգնման բաժնի ղեկավար Նավասարդ Դադյանին և հիմնադրամի անտառագետ Մկրտիչ Գևորգյանին: Հանդիպմանը ներկա էին նաև մարզպետարանի գյուղատնտեսության և բնապահպանության վարչության պետ Արուս Թումանյանը, բնապահպանության բաժնի պետ Արտակ Դեմիրչյանը:
Ն. Դադյանը համառոտ ներկայացրեց հիմնադրամի գործունեությունը՝ նշելով, որ իրականացնում են կենսական նշանակություն ունեցող բնապահպանական ծրագրեր` Հայաստանի քաղաքներում և գյուղերում, այդ թվում և՝ Լոռու մարզում։

1994թ.-ից «Էյ Թի Փի»-ն հսկայական աշխատանք է իրականացրել. տնկվել և վերականգվել են միլիոնավոր ծառեր և ստեղծվել բազմաթիվ աշխատատեղեր: «Էյ Թի Փի»-ն նպաստում է Հայաստանի սոցիալ-տնտեսական զարգացմանը՝ ներգրավելով միջոցներ անտառների վերականգնումը ֆինանսավորելու համար: Կազմակերպության կողմից աճեցված և տնկված ծառերը նաև կենսական նշանակություն ունեն. նրանք մարդկանց ապահովում են սննդով, փայտով, բնապահպանական բարիքներով և տնտեսության աճի համար անհրաժեշտ հնարավորություններով: Նա նաև ներկայացրեց 2020թ. մարզում իրականացված աշխատանքները և այս տարվա ծրագրերը:
Շնորհակալություն հայտնելով մարզում կյանքի կոչված ծրագրերի համար՝ Արամ Խաչատրյանը հետագա համագործակցության պատրաստակամություն հայտնեց՝ նշելով, որ առաջիկայում կլինի Մարգահովիտ համայնքում գտնվող բնապահպանական կրթության կենտրոնում և տնկարաններում՝ հիմնադրամի գործունեությանը տեղում ծանոթանալու նպատակով:
Հիմնադրամի կողմից Լոռու մարզում 2020թ. ընթացքում իրականացրել է.
 Անտառտնկման աշխատանքներ Ազնվաձոր համայնքի 42,1 հա, Պրիվոլնոյե համայնքի 29.82 հա, Ուռուտ համայնքի 16.2 հա համայնքային տարածքներում։
 Բովաձոր համայնքի 39.14 հա տարածքում 2019թ. հիմնադրված անտառմշակույթների լրացման աշխատանքներ:
 Համայնքային ծառատունկ ծրագրի շրջանակներում մարզի համայնքներին ու տարբեր կազմակերպություններին տրամադրվել է շուրջ 2000 տնկիներ:
 Ազնվաձոր, Պրիվոլնոյե, Բովաձոր և Ուռուտ համանքներում տնկման համար նախատեսված տարածքները ցանկապատված են բետոնե հենասյուններով և 5 շարք ցինկապատ փշալարով։ Ընդհանուր անցկացվել է 11.3 կմ ցանկապատ և օգտագործվել է շուրջ 3300 հատ հենասյուն և 4800 կգ փշալար։
 Լոռու մարզպետարանի, ՀՀ աշխատանքի և սոցիալական հարցերի նախարարության և «Էյ-Թի-Փի» բարեգործական հիմնադրամի եռակողմ համագործակցության արդյունքում Մեծավան համայնքի Միխայելովկա բնակավայրի 41.4 հա և Տաշիր համայնքի 45 հա և 53.4 հա տարածքներում իրականացվել են «Էյ-Թի-Փի» բարեգործական հիմնադրամի կողմից նախորդ տարիներին հիմնադրված անտառմշակույթների լրացման և խնամքի աշխատանքներ: Ծրագրում ներգրավվել են ավելի քան 100 մարդ: Այս ծրագիրն իրականացնելու համար պետբյուջեից ներդրումը կազմել է 4.5 մլն. դրամ, իսկ հիմնադրամի կողմից շուրջ 4 մլն. դրամ:

2021թ. ծառերի խնամքի, ցանկապատի վերանորոգման աշխատանքները կպլանավորվեն տարվա ընթացքում իրականացվող ուսումնասիրություններից հետո ըստ անհրաժեշտության։ Նախատեսվում է Լոռու մարզում իրականացնել 2020թ. հիմնված շուրջ 88 հա անտառտմշակույթների լրացման և խնամքի աշխատանքներ, ինչպես նաև աշխատանքներ են տարվում Լոռու մարզի համայնքների հետ 2021թ. անտառտնկման համար անհրաժեշտ համապատասխան տարածքներ տրամադրելու համար:

Հիմնադրամը մարզում իրականացրել է նաև տարաբնույթ բնապահպանական ուսուցողական դասընթացներ, անվճար հիմունքներով համայնքներին է տրամադրում պտղատու և դեկորատիվ տնկիներ: