Լոռու մարզպետի աշխատակազմ

Լոռու մարզպետ Անդրեյ Ղուկասյանն այսօր հանդիպեց «Էկոոլայֆ» ընկերության ներկայացուցիչներին՝ ղեկավար Կարեն Ռոստոմյանի գլխավորությամբ:Հանդիպմանը մասնակցում էին նաև մարզպետի տեղակալ Գայանե Մարկոսյանն ու ծրագրերի, զբոսաշրջության ու վերլուծության բաժնի պետ Հերմինե Գասպարյանը:

Ընկերությունը Լոռու մարզում նախատեսում է իրականացնել թափված տերևների, էտած ճյուղերի, ծղոտի մշակման արդյունքում պելետների արտադրություն, ինչպես նաև հնձած խոտից կոմբիկերի (լյուցերն) և գոմաղբից պարատանյութի պատրաստում:

Պելետը հանդիսանում է արդիական վառելանյութ և օգտագործման տեսանկյունից մեծ տարածում ունի Եվրոպական երկրներում ու Ռուսաստանում:

Ընկերության ղեկավար Կարեն Ռոստոմյանը ներկայացնելով ներդրումային ծրագիրը, կարևորեց հատկապես ծրագրի բնապահպանական բաղադրիչը: Այն ենթադրում է՝

շրջակա միջավայրի պահպանում՝ թափված տերևների այրման հետևանքով առաջացող թունավոր նյութերով աղտոտումից,

աղբավայր տարվող աղբի ծավալների նվազեցում՝ թափված տերևների և էտած ճյուղերի չափով,

այլընտրանքային վառելիքի պատրաստում, ինչը կնպաստի անտառների պահպանմանը:

Ծրագրի իրականացման արդյունքում մարզում կստեղծվեն հիմնական ու սեզոնային աշխատատեղեր: Հավաքված տերևներն ու ճյուղերը արտադրամասին հանձնող համայնքներն ու անհատներն էլ կստանան դրամական փոխհատուցում՝ հանձնած հումքի դիմաց:

Ողջունելով նախաձեռնությունը՝ Ա. Ղուկասյանը վստահեցրեց, որ պատրաստակամ է աջակցել մարզի զարգացմանը նպաստող ցանկացած ներդրումային ծրագրի:

Պայմանավորվածություն ձեռքբերվեց արտադրամասի կառուցապատման համար նպաստավոր տարածքների ընտրության ավարտից հետո անցնել գործնական քայլերի: