Տեղեկատվական կենտրոն
Նորություններ
Ա. Ղուկասյան. Քաղաքացիների դիմումներին տալ բացառապես հիմնավորված պատասխաններ
06.07.2020
![](http://lori.mtad.am/files/n_pics/25888_s.jpg)
Լոռու մարզպետ Անդրեյ Ղուկասյանն այսօր անցկացրեց հերթական աշխատանքային խորհրդակցությունը փոխմարզպետ Գայանե Մարկոսյանի, մարզպետարանի գլխավոր քարտուղար Արթուր Մխիթարյանի, կառուցվածքային ստորաբաժանումների ղեկավարների և պատասխանատու այլ պաշտոնյաների մասնակցությամբ: Վերջիններս տեղեկատվություն ներկայացրեցին նախորդ շաբաթվա ընթացքում մարզի ղեկավարի կողմից տրված հանձնարարականների կատարման արդյունքների վերաբերյալ, անդրադարձ կատարվեց հաշվետու ժամանակահատվածում իրականացված աշխատանքներին:
Հանգամանորեն քննարկվեցին մասնավորապես քաղաքաշինության, առողջապահության, գյուղատնտեսության, կրթության, հողաշինության բնագավառներում առկա խնդիրները, զարգացման ծրագրերի, սեփական եկամուտների արդյունքների բարելավման, երեխաների իրավունքների պաշտպանության և մի շարք այլ ուղղություններով տարվող աշխատանքների հետ կապված հարցեր:
Ինչպես ներկայացվեց մարզի ղեկավարին, հուլիսի 6-ի դրությամբ Լոռու մարզում կորոնավիրուսով վարակվածության ընդհանուր դեպքերի թիվը 725 է, որոնցից առողջացել են 457-ը: Արձանագրված մահվան դեպքերի ընդհանուր թիվը 8 է: Ներկա պահին բուժման մեջ է գտնվում 260 քաղաքացի, որոնցից 44-ը հոսպիտալացված են, իսկ 216-ը գտնվում են տանը՝ թաղամասային բժիշկների հսկողության տակ: Ինքնամեկուսացման մեջ է 663 քաղաքացի: Վանաձորի ինֆեկցիոն հիվանդանոցում բուժում է ստանում 23 և Սպիտակի բժշկական կենտրոնում 97 հիվանդ: Ա. Ղուկասյանին զեկուցվեց, որ համաճարակային իրավիճակը մարզում ընդհանուր առմամբ վերահսկելի է:
Մարզպետի հանձնարարությամբ վերլուծության է ենթարկվել այս տարվա առաջին կիսամյակում քաղաքացիների կողմից ստացված առաջարկությունների, դիմումների և բողոքների շարժը: Տեղեկացվեց, որ նշված ժամանակահատվածում մարզպետարան է մուտքագրվել 3478 առաջարկություն, դիմում և բողոք, նախորդ տարվա նույն ժամանակահատվածի՝ 2035-ի և 2018թ.-ի՝ 1536-ի դիմաց: Դրանք հիմնականում սոցիալական, առողջապահական, կրթական, կոմունալ- կենցաղային բնույթի են: Այս տարվա հաշվետու ժամանակահատվածում հիմնավոր պատճառներով մերժվել է դրանց ընդամենը շուրջ 10 տոկոսը: Հատկանշական է նաև, որ առողջապահական բնույթի բոլոր դիմումները բավարարվել են:
Ա. Ղուկասյանը հանձնարարեց շարունակել հետևողական աշխատանքներ իրականացնել քաղաքացիների կողմից ստացված դիմումներում բարձրացված խնդիրների լուծման ուղղությամբ, խորապես ուսումնասիրել դրանցից յուրաքանչյուրը և պատասխանները ներկայացնել հիմնավորված:
Հանձնարարականներ տրվեցին նաև մարզում իրականացվող քաղաքաշինական աշխատանքների որակի վերահսկողության, համայնքների կողմից հարկերի հավաքագրման արդյունքների բարելավման և մի շարք այլ ուղղություններով: