Լոռու մարզպետի աշխատակազմ

 Լոռու մարզպետ Անդրեյ Ղուկասյանն անցկացրեց հերթական աշխատանքային խորհրդակցությունը փոխմարզպետ Գայանե Մարկոսյանի, գլխավոր քարտուղար Արթուր Մխիթարյանի, մարզպետարանի կառուցվածքային ստորաբաժանումների ղեկավարների և պատասխանատու այլ պաշտոնյաների մասնակցությամբ:
Փոխմարզպետ Գայանե Մարկոսյանը և կառուցվածքային ստորաբաժանումների ղեկավարները ներկայացրեցին նախորդ շաբաթվա ընթացքում տրված հանձնարարականների կատարման արդյունքները, ինչպես նաև ընթացիկ այլ հարցեր:
Գ. Մարկոսյանը մասնավորապես անդրադարձավ իր համակարգման ոլորտում գործող կառուցվածքային ստորաբաժանումների գործունեության ոլորտում առկա մի շարք հարցերի: Նա տեղեկացրեց, որ հարկերի հավաքագրման ցուցանիշների առումով, նախորդ շաբաթվա համեմատությամբ թեև առաջընթաց կա, բայց տեմպերը շարունակում են չգոհացնել: Մասնավորապես՝ սեփական եկամուտների կատարողականը պլանի դիմաց 67.8 տոկոս է:
-Հարկերի հավաքագրման նման արդյունքների պարագայում մենք իհարկե համավարակով պայմանավորված օբյեկտիվ պատճառները հաշվի ենք առնում, սակայն, իմ խորին համոզմամբ, առկա է հոգեբանական գործոն ևս: Քաղաքացիները կարծում են, որ կառավարության կողմից իրականացվող նման ծավալի աջակցության ծրագրերի համատեքստում կարող են զիջումներ լինել նաև հարկերի վճարման հարցում, ինչն իհարկե իրականությանը չի համապատասխանում: Մարզի համայնքների ղեկավարների մեծ մասն էլ այս ուղղությամբ որևէ ջանք չի գործադրում, թեև քաջ գիտակցում են, թե նման արդյունքները ինչի կարող են հանգեցնել իրենց համայնքների համար: Այս երևույթը բացարձակապես անընդունելի եմ համարում,-ասաց Ա. Ղուկասյանը:
Մարզի ղեկավարը խստորեն հանձնարարեց խնդիրը պահել ամենօրյա ուշադրության կենտրոնում և հետևողական աշխատանքներ տանել համայնքների հետ՝ ցուցանիշները բոլոր հարկատեսակների գծով բարելավելու ուղղությամբ:
Մարզի ղեկավարին ներկայացվեցին նաև համավարակով պայմանավորված ստեղծված իրավիճակում իրականացվող աշխատանքները: Մասնավորապես տեղեկացվեց, որ պատշաճ վերահսկողություն է իրականացվում Պարետի ցուցումների կատարման ուղղությամբ:
Նշվեց նաև, որ Լոռու մարզում այսօրվա դրությամբ կորոնավիրուսով վարակվածության ընդհանուր դեպքերի թիվը 503 է, որոնցից առողջացել են 236-ը: Արձանագրված մահվան դեպքերի ընդհանուր թիվը՝ 7: Ներկա պահին բուժման մեջ է գտնվում 260 քաղաքացի, որոնցից 52-ը հոսպիտալացված են, իսկ 208-ը գտնվում են տանը՝ թաղամասային բժիշկների հսկողության տակ: Ինքնամեկուսացման մեջ է գտնվում 2683 քաղաքացի:
Խորհրդակցության ընթացքում անդրադարձ կատարվեց մարզի համար օրախնդիր ոլորտային մի շարք այլ հարցերի ևս:
Տրվեցին հանձնարարականներ: