Տեղեկատվական կենտրոն
Նորություններ
Քննարկվեցին օրախնդիր մի շարք հարցեր. Լոռու մարզպետն անցկացրեց աշխատանքային խորհրդակցություն
23.04.2020
![](http://lori.mtad.am/files/n_pics/24960_s.jpg)
Այսօր Լոռու մարզպետ Անդրեյ Ղուկասյանը աշխատանքային խորհրդակցություն անցկացրեց փոխմարզպետ Գայանե Մարկոսյանի, մարզպետարանի գլխավոր քարտուղար Արթուր Մխիթարյանի, մազպետարանի կառուցվածքային ստորաբաժանումների ղեկավարների և պատասխանատու այլ պաշտոնյաների մասնակցությամբ:
Օրակարգային առաջին հարցով Գ. Մարկոսյանը տեղեկատվություն ներկայացրեց մարտ և ապրիլ ամիսներին, ստեղծված իրավիճակով պայմանավորված, մարզի սոցիալապես անապահով ընտանիքներին բաշխված սոցիալական օգնությունների վերաբերյալ: Նա ասաց, որ սննդի փաթեթներ և հիգիենիկ պարագաներ են բաշխվել՝ գնված պետբյուջի միջոցներով(բաշխումն իրականացրել են «Հայկական կարմիր խաչի ընկերության» և Լոռու մարզպետարանի կողմից հավաքագրված կամավորները), «Աստղիկ» բարեգործական հիմնադրամի, Մայր Աթոռի, տարբեր անհատների, մասնավոր և հասարակական կազմակերպությունների կողմից: Ընդհանուր առմամբ աջակցություն է տրամադրվել 1700 ընտանիքի(տրամադրված բոլոր օգնությունների վերաբերյալ ամենշաբաթյա կտրվածքով տեղեկատվություն է հրապարակվել մարզպետարանի ֆեյսբուքյան էջում, պաշտոնական կայքէջում և «Լոռու մարզ» թերթում): Առաջիկայում «Աստղիկ» բարեգործական հիմնադրամի աջակցությամբ հնարավոր կլինի բաշխել ևս 500 սննդի փաթեթ՝ Վանաձոր և Ալավերդի համայնքների սոցիալապես անապահով ընտանիքներին: Աջակցություն է սպասվում նաև ՄԱԿ-ի՝ սպորտային կոշիկներ և մանկական սնունդ, ինչպես նաև «Դիակոնիա» հիմնադրամի կողմից:
-Կարևոր ենք համարում այն, որ «Աստղիկ» և «Դիակոնիա» հիմնադրամներին մեր կողմից առաջարկվել է օգնության համար նախատեսված սնունդը ձեռք բերել տեղի արտադրողներից, ինչը և հիմնականում հնարավոր է եղել իրականացնել: Այս կերպ փորձել ենք աջակցել նաև տնտեսվարողներին,-ասաց փոխմարզպետը:
Արթուր Մխիթարյանը տեղեկացրեց նաև, որ այս օրերին Լոռու մարզպետարանի կողմից ինքնամեկուսացման մեջ գտնվող 100 ընտանիքի տրամադրվել է սննդի մեկամսյա պաշար և առաջին անհրաժեշտության պարագաներ:
2020 թվականի սուբվենցիոն ծրագրերի նախապատրաստական աշխատանքների վերաբերյալ զեկուցեց մարզպետարանի քաղաքաշինության վարչության պետ Արմեն Ջանազյանը:
Նա նշեց, որ նախապես համայնքներից ստացվել է 102 սուբվենցիոն հայտ, որոնցից 4-ը, համայնքների ֆինանսական հնարավորությունները հաշվի առնելով, ետ է վերադարձվել՝ առաջարկելով գումարը համալրել և այդ ծրագրերը ներկայացնել արդեն հաջորդ տարի: Մնացյալ 98 ծրագրերից 53-ի ամբողջական փաթեթները ներկայացվել են ՀՀ տարածքային կառավարման և ենթակառուցվածքների նախարարությանը, 12 ծրագիր ներկա պահին գրեթե պատրաստ է և մնացյալ փաթեթների համալրման ուղղությամբ աշխատանքները շարունակվում են:
-Սրանց թվում կան նաև խնդրահարույց համայնքներ, որոնց հետ աշխատում ենք ամենօրյա ռեժիմով, հաճախ նույնիսկ ամբողջական աշխատանքներն իրականացվում է մեր մասնագետների կողմից,-ասաց Ա. Ջանազյանը:
Չնայած նրան, որ այս տարի հայտերի ընդունման գործընթացը մեկնակել է շուրջ 20 օր ավելի վաղ, քան նախորդ տարի, սակայն մտավախություն կա, որ որոշ համայնքներ չեն կարողանա տեղավորվել ժամկետներում: Այս առումով մարզի ղեկավարը առանձնացրեց խնդիրների երեք փունջ. առաջինը, որ ծրագրերը շատ են և նախագծողները չեն տեղավորվում ժամկետներում, երկրորդ՝ համայնքների աշխատակազմերը անկարող են իրականացնելու անհարժեշտ գործընթացը և երրորդ՝ համայնքների ղեկավարներն ուզում են աշխատել կոնկրետ նախագծողների հետ, որոնք ծանրաբեռնված են:
-Որոշակի եզրակացություններ պետք է արվեն, որպեսզի արդեն հաջորդ տարի կարողանանք խուսափել նմանատիպ խնդիրներից-ասաց Ա. Ղուկասյանը:
Հեռահար ուսուցման կազմակերպմանն անդրադարձավ մարզպետարանի կրթության, մշակույթի և սպորտի վարչության պետ Ռաֆայել Հարությունյանը:
Նա նշեց, որ մարզում, գործընթացով պայմանավորված, առկա խնդիրները բաժանվում են երկու մասի՝ կապված տեխնիկական միջոցների սակավության և ինտերներտ կապի վատ լինելու կամ իսպառ բացակայության:
Պետական աջակցության ծրագրերով փորձ է արվել լուծումներ տալ խնդիրներին՝ կարիքավոր ընտանիքներին առաջարկվել են մատչելի կապի միջոցներ, ժամանակավոր օգտագործման նպատակով տրամադրվել է համակարգչային տեխնիկա: ԿԳՄՍ նախարարության աջակցությամբ դպրոցներին հատկացվել է 56 պլանշետ, որոնք ժամանակավոր օգտագործման նպատակով տրամադրվել են 4 և ավելի դպրոցահասակ երեխաներ ունեցող ընտանիքներին, մոտ օրերս կստացվի ևս 50 պլանշետ, որոնք նույն սկզբունքով կբաշխվեն արդեն 3 դպրոցահասակ երեխա ունեցող ընտանիքներին: Աջակցության ծրագրեր են իրականացվել տարբեր անհատների և կազմակերպությունների կողմից ևս: Բացի այդ դպրոցներում առկա տեխնիկական միջոցները ժամանակավորապես տրամադրվել են դրանց կարիքն ունեցող ուսուցիչներին:
-Հեռավար դասապրոցեսի պատշաճ կազմակերպմանն ուղղված խնդիրները փորձում ենք լուծել տարբեր կերպ, որպեսզի երեխաները մեծ մասամբ կարողանան յուրացնել դպրոցական ծրագիրը: Հեռավար դասապրոցեսում ներգրավված են բոլոր դպրոցները: Գործընթացից սակայն, ամբողջությամբ դուրս են մնացել ներառական կրթական ծրագրերում ներգրավված երեխաները,-ասաց Ռ. Հարությունյանը:
Մարզում համաճարակաբանական իրավիճակի մասին զեկուցեց մարզպետարանի առողջապահության և սոցիալական ապահովության վարչության պետի պաշտոնակատար Լուսինե Վարդանյանը: Նա նշեց, որ մարզում հանրապետության մյուս մարզերի և Երևանի հետ համեմատած իրավիճակը բարվոք է: Մարզում ներկա պահին դեպքերի ընդհանուր թիվը 12 է: Հիվանդներից 8-ը առողջացել և դուրս է գրվել: Կան նաև ինքնամեկուսացման մեջ գտնվող 99 և մեկուսացման մեջ գտնվող 123 քաղաքացիներ:
Մարզում իրականացվող գյուղատնտեսական աշխատանքները ներկայացրեց գյուղատնտեսության և բնապահպանության վարչության պետի ժամանակավոր պաշտոնակատար Արտյոմ Շահվերդյանը: Նա տեղեկացրեց, որ ներկա պահին մարզում իրականացվել է 4415 հա գարնանացան, որը նախորդ տարվա նույն ժամանակահատվածի համեմատությամբ ավելի է 500 հա-ով:
-Մշակվող հողատարածքների ավելացման միտում է նկատվում: Առաջիկայում հնարավոր կլինի առավել ամբողջական տվյալներ ներկայացնել,-նշեց Ա. Շահվերդյանը:
Նրա տեղեկացմամբ, այս տարվա առաջին եռամսյակում գյուղատնտեսության ոլորտի զարգացման նպատակով տրամադրվող վարկերի սուբսիդավորման ծրագրից մարզում օգտվել է 57 շահառու, ընդհանուր առմամբ տրամադրվել է ավելի քան 242 մլն դրամի վարկ: «Խելացի» անասնագոմերի կառուցման, վերակառուցման, դրանց տեխնոլոգիական պահպանման պետական աջակցության ծրագրից մարզում օգտվել է մեկ շահառու Բովաձոր բնակավայրից, ևս մեկ քաղաքացի օգտվել է գյուղատնտեսական տեխնիկայի ֆինանսական վարձակալության` լիզինգի պետական աջակցության ծրագրից՝ ձեռք բերելով 1 տրակոտր:
Անդրադառնալով պարարտանյութի բաշխման գործընթացին՝ Ա. Շահվերդյանը նշեց, որ մատակարարի կողմից ներկա պահին 35 բնակավայրի բաշխվել է 488 տ պարարտանյութ, մատակարարը պարտք է մնացել ևս 172 տոննա: Ստեղծված իրավիճակով պայմանավորված՝ օբյեկտիվ պատճառներով այս քանակությունը չապահովելու դեպքում գումարները ետ կվերադարձվեն:
Բաժնի պետի պաշտոնակատարը տեղեկացրեց նաև, որոշ համայնքներում ոչ բարենպաստ եղանակային պայմանների պատճառով աշնանացան ցորենը վնասվել է: Առաջիկայում վարչության մասնագետները ուսումնասիրություններ կիրականացնեն՝ պարզելու վնասի չափերը:
Քննարկվեցին նաև այլ հարցեր, տրվեցին հանձնարարականներ: