Տեղեկատվական կենտրոն
Նորություններ
Մասնագիտական աջակցություն՝ Մեծավան համայնքի ղեկավարի ժամանակավոր պաշտոնակատարին՝ առկա խնդիրների հաղթահարման նպատակով
23.04.2020
![](http://lori.mtad.am/files/n_pics/24957_s.jpg)
Մարզպետ Անդրեյ Ղուկասյանի կողմից հրավիրված խորհրդակցության նպատակը՝ Մեծավան խոշորացված համայնքի ղեկավար Արման Վարդանյանի մասնակցությամբ, համայնքում առկա խնդիրների և դրանց լուծման վերաբերյալ առաջարկությունների քննարկումն էր:
Խորհրդակցությանը մասնակցում էին նաև մարզպետի տեղակալ Գայանե Մարկոսյանը, մարզպետարանի ոլորտային պատասխանատու պաշտոնյաներ:
Ինչպես նշվեց, համայնքը սուբվենցիոն միջոցներով նախատեսում է իրականացնել 6 ծրագիր՝ շուրջ 167 մլն ընդհանուր արժեքով, որից համայնքային ներդրումը կկազմի ավելի քան 83 մլն դրամ: Մարզի ղեկավարի հորդորն է. անհրաժեշտ աշխատանքներն իրականացնել շատ արագ, քանի որ ծրագրերի ներկայացման վերջնաժամկետն ապրիլի 27-ն է: Մարզպետարանի մասնագետները պատրաստ են աջակցել ծրագրային փաթեթների կազմման հարցում:
Համայնքին առնչվող խնդրահարույց հարցերի թվում է համայնքապատկան հողերի վարձակալության խնդիրը: Համայնքի նախկին ղեկավարից վատ ժառանգություն է ստացվել այս առումով. վարձակալության տրված մի քանի հողակտորների հետ կապված վիճահարույց հարցեր կան, որոշ հողատարածքների համար համայնքային բյուջե վարձակալական գումարներ մուտք չեն արվել և այժմ, մարզպետ Անդրեյ Ղուկասյանի հանձնարարությամբ, մարզպետարանի պաշտոնյաներն օգնում են կարգավորել առկա խնդիրները:
-Պետք է առաջնորդվենք բացառապես օրենքով սահմանված կարգով, և մեզ համար շատ կարևոր է, որ հողերի վարձակալության դիմաց գանձվող միջոցները համալրեն համայնքային բյուջեն,-նշեց մարզի ղեկավարը:
Ա. Վարդանյանը տեղեկացրեց նաև, որ անհամաձայնություն ունի վերջին տարիներին Մեծավան բնակավայրում կառուցված ջրագծերի և այդ նպատակով համայնքային բյուջեից ծախսված միջոցների վերաբերյալ. մարզի ղեկավարը հավաստմամբ՝ այս հարցը ևս կուսումնասիրվի:
Անդրեյ Ղուկասյանը խորհրդակցությունն ամփոփեց ուրախ լուրով. Մեծավանում ինտենսիվ այգիներ հիմնելու առաջարկությամբ իրեն է դիմել մեկ տնտեսվարող.
- Ցանկացած ներդրում մարզի համայնքներում արժանանում է մեր անվերապահ աջակցությանը,-ասաց Ա. Ղուկասյանը՝ հանձնարարելով Հողաշինության և հողօգտագործման բաժնի աշխատակիցների հետ տեղում ուսումնասիրություններ իրականացնել և արագ լուծում տալ հարցին: