Պաշտոնական էլ. փոստ

(միայն www.e-citizen.am համակարգով ծանուցումների համար)

Տպել

Տեղեկատվական կենտրոն

Նորություններ

ԴՊՐՈՑՆԵՐԻ ՄԻՋՈՑՆԵՐԻ ՎԵՐԱԲԱՇԽՄԱՆ ԱՐԴՅՈՒՆՔՈՒՄ ՇՈՒՐՋ 80 ՄԼՆ ԴՐԱՄԻ ՇԻՆԱՇԽԱՏԱՆՔՆԵՐ ԵՆ ԻՐԱԿԱՆԱՑՎԵԼ ՄԱՐԶՊԵՏ ԱՆԴՐԵՅ ՂՈՒԿԱՍՅԱՆԸ ԵՂԱՎ ՄԵԾ ԱՅՐՈՒՄ, ՆԵՂՈՑ ԵՎ ԴԵԲԵԴ ՀԱՄԱՅՆՔՆԵՐԻ ԴՊՐՈՑՆԵՐՈՒՄ

03.02.2020

 Փետրվարի 1-ին Լոռու մարզպետ Անդրեյ Ղուկասյանը մարզպետարանի մի խումբ պաշտոնյաների ուղեկցությամբ եղավ Լոռու մարզի Մեծ Այրում, Նեղոց, Դեբեդ համայնքներում՝ ծանոթանալու դպրոցներում կատարված շինարարական աշխատանքներին:
Ինչպես հայտնի է, Լոռու մարզպետ Անդրեյ Ղուկասյանի նախաձեռնությամբ 2019թ. մարզի դպրոցների կողմից տնտեսված միջոցների վերաբաշխման արդյունքում հնարավոր է եղել առավել կարիքավոր կրթօջախներում իրականացնել շուրջ 80 մլն դրամի տարաբնույթ շինարարական աշխատանքներ: Այդ ուսումնական հաստատությունների թվում են եղել նաև Մեծ Այրումի, Նեղոցի, Դեբեդի դպրոցները, որոնց երբեմնի խարխուլ տանիքներն այլևս հիմնանորոգված են: Տանիքների ասբոշիֆերից ծածկույթներն ամբողջությամբ փոխարինվել է ցինկապատ պրոֆիլավոր թիթեղից ծածկույթներով, կատարվել է նաև վնասված փայտանյութի փոխարինում և ջրահեռացում:
Մարզի ղեկավարի առաջին կանգառը Մեծ Այրում համայնքում էր:
Տեղի դպրոցի տանիքի հիմնանորոգման աշխատանքների պայմանագրային արժեքը 12 մլն դրամ է: Դպրոցը, ուր շուրջ 120 երեխա է հաճախում, լուրջ հիմնանորոգման ու ջեռուցման ապահովման կարիք ունի նաև: Բարձրացվեց նաև գազաֆիկացման խնդիրը: Չնայած ֆինանսական սուղ միջոցներին՝ որոշ աշխատանքներ հընթացս իրականացվել են, նաև միջազգային կառույցներն են աջակցություն ցուցաբերել:
Նեղոցի հիմնական դպրոցի տանիքի խնդիրը, որը նույնպես երկար տարիներ հնարավոր չէր լինում լուծել, այժմ ամբողջությամբ նորացված է: Ծրագրի պայմանագրային արժեքը 3.198 մլն դրամ է: Այստեղ համեմատաբար պայմաններն ավելի բարվոք էին և տնօրենի վստահեցմամբ, տանիքի վերանորոգումից հետո կհամարձակվեն ավելի շատ աշխատանքներ իրականացնել:
-Ամեն անգամ սրտի դողով էինք սպասում անձրևի կամ ձյան գալուն: Այժմ մեզ համար ամեն խնդիր հաղթահարելի է,- ասաց դպրոցի տնօրենը: Նա առաջնահերթության կարգով կարևորեց դպրոցի գազաֆիկացման անհրաժեշտությունը:
Այցի վերջին կանգառը Դեբեդի միջնակարգ դպրոցում էր: Այստեղ տանիքի հիմնանորոգման պայմանագրային արժեքը կազմել է 6.739 մլն դրամ: Դպրոցում առաջնային խնդիրը կոսմետիկ նորոգումն ու հատակի նորացումն էր, քանի որ բացի տանիքի խնդրից, լուծված է նաև ջեռուցման, դռների ու պատուհանների նորացման հարցը:
Դպրոցներ այցի ընթացքում մարզպետ Անդրեյ Ղուկասյանը շրջեց բոլոր դասասենյակներով, աշակերտներից հետաքրքրվեց նրանց առաջադիմությամբ: Զրուցեց նաև ուսուցչական կոլեկտիվների հետ՝ պատասխանելով նրանց հուզող հարցերին: Մարզի ղեկավարը դպրոցների կոլեկտիվներին տեղեկացրեց, որ ՀՀ վարչապետի հանձնարարությամբ կգույքագրվեն բոլոր դպրոցների խնդիրները, կպատրաստվեն նախագծեր՝ ըստ առաջնահերթության դրանք լուծելու նպատակադրմամբ :
-Մեր պետությունը, այդ թվում և մեր կրթության ոլորտը, գտնվում է առողջացման փուլում և այն քայլերը, որոնք ներկայում արվում են, դրա մի փոքր դրսևորումն են միայն: Մեզ համար ամոթալի է, որ մեր երկրում լինեն խարխուլ ու չվերանորոգված դպրոցներ: Այս խնդիրը շատ կարճ ժամանակ անց լուծում է ստանալու: Ձեր առաքելությունը միմիայն կրթության որակի ապահովումն է ու բանիմաց սերունդներ կրթելը,-ասաց Անդրեյ Ղուկասյանը՝ նշելով նաև,որ ուսուցիչների աշխատավարձերի բարձրացումը շարունակական բնույթ է կրելու: Ինչ վերաբերում է երթևեկող ուսուցիչներին, որոնց թիվն առավել մեծ է գյուղական համայնքներում, այս տարի առաջին անգամ գումարի փոխհատուցում են ստանում, և մարզին այդ նպատակով տրվող միջոցները ևս աճելու միտում ունեն:
Թե՛ համայնքների ղեկավարները և թե՛ դպրոցների ուսուցչական կոլեկտիվներն իրենց երախտագիտությունը հայտնեցին մարզի ղեկավարին հոգացավ վերաբերմունքի և պատրաստակամության համար:

← Վերադառնալ ցուցակին

Բաժանորդագրում նորություններին

Տեխնիկական դիտողություններն կարող եք ուղարկել կայքի վեբ-մաստերի էլեկտրոնային փոստին: Կայքը պատրաստված է Helix ընկերության կողմից:
Վերջին թարմացումը՝ 2020-02-28 12:36:12