Լոռու մարզպետի աշխատակազմ

«Էներգետիկայի հայկական գործակալություն» հիմնադրամի ու Լոռու մարզպետարանի համագործակցության արդյունքում Վանաձորում օրեր առաջ տեղադրվեց էլեկտրոմոբիլների լիցքավորման առաջին կայանը:

Այն հնարավոր է եղել  իրականացնել «Էներգետիկայի հայկական գործակալություն» հիմնադրամի և ԳԷՀ-ի 2018թ.-ի միջև նոյեմբերի 15-ին կնքված ARM/SGP/OP6 /Y4/STAR/CC/18/14 պայմանագրով ՓԴԾ «Plug.am` էլեկտրական մեքենաների խթանումը Հայաստանում» ծրագրի շրջանակներում:

Այն գտնվում է Լոռու մարզպետարանի հարևանությամբ: Վանաձորում արդեն որոշ տաքսի ծառայություններն ունեն էլեկտրոմոբիլներ և օգտվում  են լիցքավորման սարքի ծառայություններից: Նշենք նաև, որ այն միառժամանակ անվճար կլինի: Այսօր տեղի ունեցավ կայանի հանդիսավոր բացումը, որին մասնակցում էին Լոռու մարզպետ Անդրեյ Ղուկասյանը, մարզպետարանի պաշտոնյաներ, հիմնադրամի գլխավոր տնօրենի տեղակալ Հայկ Բադալյանը, ներկայացուցիչներ: Միջոցառման ընթացքում մեքենայի ցուցադրական լիցքավորում կատարվեց: Անդրեյ Ղուկասյանն անձամբ ցանկություն հայտնեց վարել մեքենան:

-Ապագան էլեկտրամոբիլներինն է, ու էլեկտրասնուցվող մեքենաների լիցքավորման ապահովման հնարավորությանն ուղղված քայլերը մենք սկսում ենք այսօրվանից: Կառավարության դիրքորոշումն այսօր էկոլոգիապես մաքուր տեխնոլոգիաների խթանումն է: Այս ծրագրի շրջանակներում փորձում ենք խրախուսել նաև արևային էլեկտրակայանների գործարկումը՝ այս ուղղությամբ ևս իրականացնելով գործուն քայլեր,-իր խոսքում նշեց մարզի ղեկավարը: