Լոռու մարզպետի աշխատակազմ

Անցկացվեց Լոռու մարզի զբաղվածության աջակցության մարզային հանձնաժողովի նիստը, որը վարում էր հանձնաժողովի նախագահ, մարզպետի տեղակալ Գայանե Մարկոսյանը: Հանձնաժողովի քարտուղար, մարզպետարանի առողջապահության և սոցիալական ապահովության վարչության սոցիալական ապահովության բաժնի պետ Վալերի Ջաղինյանն առաջարկեց հաստատել Սպիտակ համայնքի կողմից իրականացվելիք «Սպիտակ համայնքի ճանապարհների հարակից տարածքների բարեկարգման օժանդակ աշխատանքներ» ծրագիրը, որը նախատեսվում է իրականացնել նոյեմբերի 25-դեկտեմբերի 12-ն ընկած ժամանակահատվածում: Ծրագրում զբաղված կլինի 8 աշխատանք փնտրող քաղաքացի: Գ. Մարկոսյանը կարևորեց աշխատանքը ժամկետներում և որակով իրականացնելու անհրաժեշտությունը՝ նշելով, որ դրանք լինելու են մարզպետարանի վերահսկողության ներքո: Նա իր խոսքում կարևորեց նաև այս ծրագրի շրջանակներում գործազուրկ քաղաքացիների գոնե ժամանակավոր զբաղվածության խնդրի լուծումը:
Հիշեցնենք, որ «Վարձատրվող հասարակական աշխատանքների կազմակերպման միջոցով գործազուրկների ժամանակավոր զբաղվածության ապահովման» կարգի պահանջներին համապատասխան ՀՀ աշխատանքի և սոցիալական հարցերի նախարարը օրեր առաջ Լոռու մարզպետին էր ուղղել գրություն, ըստ որի, ծրագրի շրջանակներում առաջարկվել էր մինչև տարեվերջ իրականացնել լրացուցիչ ծրագրեր:
Գայանե Մարկոսյանի և հանձնաժողովի մյուս անդամների կողմից ծրագրեր ունեցող մի շարք համայնքների ղեկավարների առաջարկվել է դրանք կրկին ներկայացնել, սակայն վերջիններս մտավախություն ունենալով, որ սահմանված ժամկետներում չեն կարող իրականացնել, հրաժարվել էին՝ զրկելով իրենց համայնքները թե՛ ծրագրեր իրականացնելու և թե՛ ժամանակավոր զբաղվածության խնդիր լուծելու առկա հնարավորությունից: Հնարավոր է եղել առաջարկել ընդամենը երկու ծրագիր՝ Գեղասար և Սպիտակ համայնքներում: