Տեղեկատվական կենտրոն
Նորություններ
ՄԱՐԶԻ ՂԵԿԱՎԱՐԸ ԾԱՆՈԹԱՑԱՎ ՍՊԻՏԱԿԻ ՏԱՐԱԾԱՇՐՋԱՆԻ ՀԱՄԱՅՆՔՆԵՐՈՒՄ ՍՈՒԲՎԵՆՑԻՈՆ ՄԻՋՈՑՆԵՐՈՎ ԻՐԱԿԱՆԱՑՎՈՂ ԾՐԱԳՐԵՐԻՆ
19.11.2019
![](http://lori.mtad.am/files/n_pics/23064_s.jpg)
Մարզպետ Անդրեյ Ղուկասյանն այսօր մարզպետարանի մի խումբ պատասխանատու պաշտոնյաների ուղեկցությամբ աշխատանքային այցով եղավ Սպիտակի տարածաշրջանի Ջրաշեն, Սարամեջ, Սպիտակ, Լեռնանցք համայնքներում ծանոթանալով պետություն–համայնք համատեղ ներդրմամբ իրականացվող սուբվենցիոն ծրագրերի ընթացքին:
Մարզի ղեկավարին ընկերակցում էին «Մեկ օր Լոռու մարզպետի հետ» ծրագրի մասնակիցներ Լևոն Խառատյանը և Միլենա Կիրակոսյանը:
Առաջին կանգառը Ջրաշեն համայնքում էր: Այստեղ սուբվենցիոն միջոցներով իրականացվում է թիվ 10 փողոցի սալիկապատում՝ տուֆ քարով: Տարածքն ընդգրկում է 6727 քառ.մ: Շինաշխատանքների պայմանագրային արժեքը՝ 51.585 մլն. դրամ է: Թեև աշխատանքների ավարտը նախատեսվում էր մինչև այս ամսվա վերջ, սակայն դրանք դանդաղում են անհրաժեշտ որակի քարի արդյունահանման ծավալների պատճառով: Այսուհանդերձ համայնքի ղեկավարը մարզպետին խոստացավ, որ աշխատանքները շատ չեն ձգձգվի՝ փոխարենը նշվեց, որ դրանք շատ որակով են կատարվում և տուֆով ճանապարհը շատ երկար կծառայի համայնքին:
Սարամեջ համայնքում ասֆալտապատվել է գլխավոր ճանապարհը՝ 1.638 քառ.մ: Ծրագրի պայմանագրային արժեքը 14.44 մլն.դրամ է: Ճանապարհի հետ կապված փորձաքննություն կկատարվի՝ պարզելու աշխատանքները համապատասխանու՞մ են սահմանված պահանջներին, թե՝ ոչ:
Սպիտակ համայնքում մարզպետը ծանոթացավ սուբվենցիոն միջոցներով իրականացված Առափնյա թաղամասի անձրևաջրատարի կառուցման (պայմանագրային արժեքը՝ 5.64 մլն.դրամ), ընթացքի մեջ գտնվող Պանրագործների թաղամասի անձրևաջրատարի կառուցման, մայթերի եզրաքարերի ուղղման և ասֆալտապատման(պայմանագրային արժեքը՝ 20.413 մլն.դրամ) աշխատանքներին: Ծրագրի ավարտը նախատեսվում է մինչև նոյեմբերի վերջ: Իսկ Տաշիր, Էստոնական, ՈՒզբեկական և Բանավան թաղամասերի փողոցային լուսավորության համակարգերի կառուցման ծրագիրը նախատեսվում է ավարտին հասցնել մինչև տարեվերջ: Ծրագրի պայմանագրային արժեքը՝ 15.360 մլն.դրամ է:
Այցի վերջին կանգառը Լեռնանցք համայնքում էր: Այստեղ սուբվենցիոն միջոցներով տեղադրվել են Արևային էլեկտրակայաններով սնվող լուսավորության համակարգեր: Ծրագրի պայմանագրային արժեքը 8.880 մլն.դրամ է:
Մարզի ղեկավարը մեկ անգամ ևս հորդորեց աշխատանքներն իրականացնել որակյալ՝ նշելով, որ անորակ աշխատանքները պարզապես չեն ֆինանսավորվի: