Տեղեկատվական կենտրոն
Նորություններ
«Հաշմանդամությունը որպես մարտահրավեր» ծրագրի շրջանակներում կարուձևի հմտություններ է ձեռք բերել 15 կին. տեղի ունեցավ ծրագրի փակման արարողությունը
18.11.2019
![](http://lori.mtad.am/files/n_pics/23046_s.jpg)
Լոռու մարզպետի տեղակալ Գայանե Մարկոսյանը, մարզպետարանի մի խումբ պատասխանատու պաշտոնյաների ուղեկցությամբ Լոռու տարածաշրջանային քոլեջում ներկա գտնվեց «Եվրասիա» բարեգործական հասարակական կազմակերպության «Հաշմանդամությունը որպես մարտահրավեր» ծրագրի փակման հանդիսավոր արարողությանը: Միջոցառմանը ներկա էին նաև ՀՀ-ում Լեհաստանի Հանրապետության արտակարգ և լիազոր դեսպան Պավել Չեպլակը, «Եվրասիա» բարեգործական հասարակական կազմակերպության գլխավոր տնօրեն Լիանա Եսայանը:
Ծրագիրն իրականացվել է «Եվրասիա» ԲՀԿ և Հայաստանում Լեհաստանի Հանրապետության դեսպանության համագործակցության արդյունքում ՀՀ-ում Լեհաստանի Հանրապետության դեսպանության «Փոքր դրամաշնորհային աջակցություն» ծրագրի շրջանակներում:
Վերջինիս շնորհիվ հաշմանդամություն ունեցող թվով 15 կանայք 4․5 ամիս շարունակ անցել են կարուձևի դասընթաներ: Ծրագրի նպատակն է եղել պաշտպանել հաշմանդամություն ունեցող կանանց աշխատելու իրավունքը, դյուրացնել նրանց մուտքն աշխատաշուկա: Կանայք ստացել են նաև իրավաբանական աջակցություն և հետագայում սեփական գործունեություն ծավալելու համար համապատասխան սարքավորումներ ու պարագաներ։
Հյուրերը շրջեցին քոլեջի տարածքով, ծանոթացան ինչպես ծրագրի շրջանակներում տարվող աշխատանքներին, այնպես էլ՝ քոլեջի գործունեությանը, ապա ներկա գտնվեցին գլխավոր միջոցառմանը:
Իրականացված ծրագրի կարևորությունն իր խոսքում ընդգծեց մարզպետի տեղակալ Գայանե Մարկոսյանը.
-Հայ-լեհական բարեկամությունը երկար տարիների պատմություն ունի: Համագործակցությունն առկա է ամենատարբեր ոլորտներում և Նոր Հայաստանի իշխանությունները պատրաստակամ են ու բաց բոլոր երկրների հետ ակտիվ գործակցության, այդ թվում և Լոռու մարզը: Մեր մարզում ևս Լեհաստանի Հանրապետության աջակցությամբ տարբեր ծրագրեր են իրականացվել: Լոռու մարզպետարանը պատրաստակամ է բարեկամանալու Լեհաստանի որևէ մարզի հետ՝ կնքելով համագործակցության հուշագիր, և մենք այդ ուղղությամբ աշխատանքներ ենք իրականացնում:
Ուզում եմ մարզի ղեկավարի և իմ անունից շնորհակալություն հայտնել այս ծրագրի համար, որը հաշմանդամություն ունեցող կանանց ապրելու, սեփական գործն ունենալու հնարավորություն է ընձեռել: Վստահ եմ՝ մեր համագործակցությունը կշարունակվի՝ իր արտացոլումը գտնելով բազմաթիվ այլ ծրագրերում,-ասաց փոխմարզպետը:
Ողջույնի խոսքով հանդես եկան նաև դեսպան Պավել Չեպլակը, քաղաքապետ Մամիկոն Ասլանյանը, Լիանա Եսայանը, Լոռու տարածաշրջանային պետական քոլեջի տնօրեն Տիգրան Թադևոսյանը, Վանաձորի զբաղվածության տարածքային կենտրոնի տնօրեն Արա Առաքելյանը:
Գեղարվեստական կատարումներից և հագուստների ցուցադրություններից հետո, դասընթացի մասնակից կանայք ստացան հավաստագրեր և կարուձևի պարագաներ: