Լոռու մարզպետի աշխատակազմ

Այսօր Լոռու մարզպետ Անդրեյ Ղուկասյանն անցկացրեց հերթական աշխատանքային խորհրդակցությունը մարզպետի տեղակալ Գայանե Մարկոսյանի, մարզպետարանի կառուցվածքային ստորաբաժանումների ղեկավարների և մարզպետարանի պատասխանատու այլ պաշտոնյաների մասնակցությամբ:
Նախորդ ժամանակահատվածում կատարված աշխատանքների մասին զեկուցմամբ հանդես եկավ Գայանե Մարկոսյանը: Վերջինս մասնավորապես անդրադարձավ իր համակարգման ոլորտում գործող ստորաբաժանումների հետ իրականացված աշխատանքներին, անցկացված միջոցառումներին, հանդիպում-քննարկումներին, քաղաքացիների ընդունելության արդյունքներին և այլն: Մարզպետի տեղակալը հանգամանորեն անդրադարձավ հատկապես մարզի զբոսաշրջային ոլորտի ներկայացուցիչների հետ նախորդ շաբաթ անցկացված խորհրդակցության, ինչպես նաև սեփական եկամուտների հավաքագրման ուղղությամբ իրականացվող աշխատանքների արդյունքներին՝ նշելով, որ նշված ուղղություններով ակնկալվում է դրական տեղաշարժ:
Սեփական եկամուտների հավաքագրման ընթացքի վերաբերյալ տեղեկատվություն ներկայացրեց ՏԻ և ՀԳՄ հարցերով վարչության պետ Դավիթ Մանուչարյանը: Ըստ վարչության պետի, նոյեմբերի 1-ի դրությամբ մարզի համայնքների եկամուտների կատարողականը պլանի դիմաց կազմել է 73.6 տոկոս, պլանը թերակատարվել է 658 մլն դրամով: Խոսելով խնդրի կարգավորման անհրաժեշտության մասին՝ բարձրացվեց բազաների ճշգրտման և բյուջեների ճիշտ պլանավորման կարևորությունը: Այսուհանդերձ նշվեց, որ համայնքների մեծ մասը պատրաստակամություն է հայտնել կատարողականը տարեվերջին հասցնել 100 և ավելի տոկոսների:
Մարզի ղեկավարը մտահոգիչ և անընդունելի համարելով ստեղծված իրավիճակը՝ շեշտեց, որ վատ հավաքագրումների իրական պատճառները որոշ համայնքներում ստեղծված անվստահության մթնոլորտն է և համայնքների ղեկավարների անգործությունը:
Սուբվենցիոն ծրագրերի ընթացքը ներկայացրեց մարզպետարանի քաղաքաշինության վարչության պետ Արմեն Ջանազյանը: Նրա տեղեկացմամբ, նշված աշխատանքների նկատմամբ վարչությունը խիստ վերահսկողություն է իրականացնում: 2019թ. մարզում իրականացվող 56 ծրագրից 25-ն ավարտվել են, 23-ն ընթացքի մեջ են, 5-ն՝ ավարտական փուլում և 3 օբյեկտների մրցույթները կայացել, բայց աշխատանքները դեռևս չեն սկսվել:
Ըստ վարչության պետի դիտարկումների, ընդհանուր առմամբ որոշ օբյեկտների շինաշխատանքները դանդաղում են, ինչ-ինչ պատճառներով խախտվում է սահմանված ժամանակացույցը և ամենայն հավանականությամբ անհրաժեշտություն կառաջանա դրանք տեղափոխել հաջորդ տարի:
Կրկին անգամ կարևորելով շինաշխատանքների որակը՝ մարզպետ Անդրեյ Ղուկասյանը շեշտեց, որ շինկազմակերպությունները կֆինանսավորվեն միայն այն դեպքում, երբ իրականացված աշխատանքները կլինեն առանց թերությունների:
Ա. Ջանազյանն անդրադարձավ նաև մարզային ենթակայության դպրոցներում իրականացվող շինարարական աշխատանքների ընթացքին: Հարցի առնչությամբ մարզի ղեկավարի հանձնարարականը կրկին խիստ էր. դպրոցների խնայողություններով իրականացվող ցանկացած շինարարական աշխատանք ևս պետք է լինի մարզպետարանի անմիջական վերահսկողության ներքո:
Մարզպետ Անդրեյ Ղուկասյանը համապատասխան ստորաբաժանումներին հանձնարարականներ հնչեցրեց նաև մանկապարտեզների կողմից երեխաներին տրվող սննդակարգը վերահսկելու, ինչպես նաև մարզային ենթակայության դպրոցների սննդի կետերի սանիտարահիգիենիկ վիճակի վերահսկողության սահմանման վերաբերյալ:
Քննարկվեցին նաև այլ հարցեր, տրվեցին հանձնարարականներ: