Տեղեկատվական կենտրոն
Նորություններ
ԼՈՌՈՒ ՄԱՐԶՊԵՏ ԱՆԴՐԵՅ ՂՈՒԿԱՍՅԱՆԻ ՇՆՈՐՀԱՎՈՐԱԿԱՆ ՈՒՂԵՐՁԸ ՏԱՇԻՐԻ ՕՐՎԱ ԿԱՊԱԿՑՈՒԹՅԱՄԲ
10.10.2019
Սիրելի՛ տաշիրցիներ,
բազում ավանդույթներով լի համայնքի հարգարժա՛ն բնակիչներ,
ջերմորեն շնորհավորում եմ Ձեզ քաղաքի օրվա կապակցությամբ:
Տաշիր քաղաքը մշտապես ունեցել է իր ուրույն դեմքն ու դիմագիծը, որով տարբերվել է ու այժմ էլ առանձնանում է հանրապետության այլ համայնքներից: Տաշիրցի լինելու մեծագույն հպարտությունն է, թերևս, որ ձեզ մղում է շենացնելու, է՛լ ավելի լավը դարձնելու Ձեր ծննդավայրը, պահպանելու և կայուն ավանդույթների վերածելու Ձեր պապերի նիստուկացը, վարքն ու բարքը:
Համայնքին մաղթում եմ նորանոր զարգացումներ և առաջընթաց՝ ինչպես քաղաքում, այնպես էլ՝ ժողովրդի կյանքում և աշխատանքի մեջ:
Տաշիր քաղաքը մշտապես առանձնացել է նաև իր համեղ կաթնամթերքով, պանիրների համեղ տեսականիով ու պատահական չէ, որ այստեղ մեծ հանդիսավորությամբ նշում եք նաև Պանրի փառատոնը՝ այն դարձնելով Ձեր համայնքի բրենդը. էլ ի՞նչ Տաշիր առանց տեսակ-տեսակ պանիրների, ալպիական դաշտերի բույրով համեմված համեղ կաթնամթերքի:
Մաղթում եմ, որ առաջիկայում ինչպես այդ ոլորտում, այնպես էլ՝ հասարակական նշանակության այլ բնագավառներում միմիայն հաջողություններ գրանցեք՝ ի նպաստ համայնքի ու մարզի զարգացման:
Շնորհավո՛ր Տաշիրի օր: