Տեղեկատվական կենտրոն
Նորություններ
ԼՈՌՈՒ ՄԱՐԶՊԵՏԻ ՏԵՂԱԿԱԼ ԳԱՅԱՆԵ ՄԱՐԿՈՍՅԱՆՆ ԸՆԴՈՒՆԵՑ «ՀՈՒՅՍ ՀԱՅԱՍՏԱՆԻ» ԿԱԶՄԱԿԵՐՊՈՒԹՅԱՆ ՆԵՐԿԱՅԱՑՈՒՑԻՉ ՀԱՅԱԶԳԻ ԺԻԼԲԵՐ ԼԵՈՆՅԱՆԻՆ
13.08.2019
![](http://lori.mtad.am/files/n_pics/21686_s.jpg)
Այսօր Լոռու մարզպետի տեղակալ Գայանե Մարկոսյանն ընդունեց «Հույս Հայաստանի» կազմակերպության ներկայացուցիչ, հայազգի Ժիլբեր Լեոնյանին:
Կազմակերպությունը տարիներ շարունակ հայ-ֆրանսիական համագործակցության շրջանակներում բազմաթիվ ծրագրեր է իրականացրել նաև Լոռու մարզում:
Ներկայացնելով հյուրին՝ մարզպետի խորհրդական Լևոն Ասլանյանը տեղեկացրեց, որ նա 1994 թվականից «Հույս Հայաստանի» կազմակերպության ներկայացուցիչն է:
Սպիտակի Դանիել Սահակյանի անվան թիվ 2 դպրոցի շինարարության իրականացման գործում ունեցել է ծանրակշիռ ներդրում: Կրկին Սպիտակ քաղաքում հիմնադրվել է մանկական ատամնաբուժարան, ևս մեկը՝ Արևաշող համայնքում:
Այժմ Շիրակամուտի դպրոցում իրականացվող հերթական ծրագրով կկառուցվի ջեռուցման համակարգ:
Ժիլբեր Լեոնյանը խոսեց կատարված աշխատանքներից և հետագա ծրագրերից, որոնք իրենց կազմակերպությունը լիահույս է իրականացնել Լոռու մարզպետարանի անմիջական մասնակցությամբ և գործուն աջակցությամբ:
Գայանե Մարկոսյանը վստահեցրեց, որ անհրաժեշտության դեպքում մարզպետարանը պատրաստ է հանդես գալու կայուն գործընկերոջ կարգավիճակով, աջակցելու բարեգործական ցանկացած նախաձեռնության, խորացնելու հայ-ֆրանսիական դարավոր բարեկամությունն ու ֆրանսիական մարզերի ու քաղաքների միջև ստեղծված գործընկերային ջերմ հարաբերությունները:
Խոսելով մարզպետի անունից, Գ. Մարկոսյանը նշեց, որ Լոռին ներդրումային լայն հնրավորությունների տարածք է, և մարզի ղեկավարն անձամբ է շահագրգռված նորանոր շփումներ ու գործընկերային կապեր հաստատել արտերկրի հետ՝ համագործակցելով այնտեղ բնակվող մեր հայրենակիցների հետ:
Ժիլբեր Լեոնյանը ջերմ ողջույներ փոխանցեց մարզի ղեկավարին և հույս հայտնեց, որ հաջորդ հանդիպումը կլինի հստակ ծրագրի աշխատանքային քննարկման տեսքով: