Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Դարպաս համայնքում հիմնված կոմպոզիտային գազաբալոնների գործարանը վաղվանից կսկի լայնամասշտաբ արտադրությունը. մարզպետն ընդունեց ընկերության համասեփականատերերին
12.08.2019
Օգոստոսի 9-ին մարզպետ Անդրեյ Ղուկասյանն ընդունեց «Ռադ Սանե Վաշամիր գրուպ» ՍՊԸ հիմնադիրներ Հուսեյն Յաղուբպուրին և Արայիկ Ասրյանին, ովքեր եկել էին տեղեկացնելու, որ ընկերության կողմից Լոռու մարզի Դարպաս համայնքում հիմնված կոմպոզիտային գազաբալոնների գործարանը վաղվանից կսկի լայնամասշտաբ արտադրությունը: Հանդիպմանը ներկա էր նաև մարզպետի տեղակալ Գայանե Մարկոսյանը:
-Այս պահի վերջին մոնտաժային աշխատանքներն են իրականացվում: Եղած արտադրանքը կպահեստավորվի: Շուրջ 2 շաբաթից հավանաբար կստանանք վաճառքի արտոնագիրը և անցում կկատարենք լիարժեք գործունեության, -ասացին համասեփականատերերը՝ հրավիրելով մարզպետին այցելել գործարան՝ ծանոթանալու արտադրական գործընթացին:
Նրանք նաև հայտնեցին, որ աշխատակիցներ են հավաքագրում, ցանկալի է՝ իգական սեռի և բարձրագույն կրթությամբ, քանի որ, ըստ Հուսեյն Յաղուբպուրի և Արայիկ Ասրյանի, այս ամիսների աշխատանքը ցույց է տվել, որ կանայք աշխատանքում ավելի պատասխանատու են և ուշադիր:
Հյուրերը մարզի ղեկավարին խնդրեցին նաև աջակցել նոր հողատարածք ձեռքբերելու հարցում՝ կարբոնի մանրաթելերի և մետաղի ջարդոներից իրերի պատրաստման արտադրամասեր կառուցելու համար, ինչը մարզի ղեկավարի կողմից արժանացավ դրական արձագանքի: Մարզպետը Հ. Յաղուբպուրի խնդրանքով խոստացավ աջակցել նաև պարսիկ գործարարների հանդիպումը ՀՀ վարչապետի հետ կազմակերպելու հարցում:
