Տեղեկատվական կենտրոն
Նորություններ
Թեղուտի վերագործարկման առաջին օրը մարզպետ Անդրեյ Ղուկասյանն անցկացրեց աշխատակիցների հետ
10.07.2019
![](http://lori.mtad.am/files/n_pics/21189_s.jpg)
Լոռու մարզպետ Անդրեյ Ղուկասյանը, ինչպես խոստացել էր Ալավերդու պղնձաձուլական գործարանի մի խումբ աշխատակիցների հետ հանդիպման ժամանակ, եղավ Թեղուտի հանքավայրում և Ալավերդու համայնքապետարանում հանդիպեց գործարանի շուրջ 20 աշխատակիցներին և «Էյ-Սի-Փի» ՓԲ ընկերության տնօրեն Լուսինե Մեջլումյանին:
«Թեղուտ» ՓԲԸ-ի գործադիր տնօրեն Կարեն Ղազարյանի ուղեկցությամբ մարզի ղեկավարը շրջեց հանքավայրի տարածքում, ծանոթացավ ներկայում տիրող պայմաններին և առաջիկա այն աշխատանքներին, որոնք նախատեսվում է իրականացնել՝ հանքի շահագործումն առավել անվտանգ ու արդյունավետ կազմակերպելու համար:
Հուլիսի 8-ին ընկերությունն ստացել է հանքի շահագործման թույլտվություն՝ տարեկան 7 մլն տոննա հանքաքար արտադրելու համար, ինչը ենթադրում է հանքի՝ 15-20 տարի շահագործման հնարավորություն:
Մարզպետը եղավ ընկերության արտադրամասում և պոչամբարի տարածքում: Ընկերության գործադիր տնօրենը խոսեց նաև պոչամբարի հետ կապված խնդիրներից:
Աշխատանքներ են իրականացվում ընդլայնվելու, հանքային տեխնիկան, ֆաբրիկայի տեխնոլոգիական և այլ սարքավորումները վերագործարկելու ուղղությամբ: Մարզպետը կարևորեց հանքի անվտանգ շահագործման անհրաժեշտությունը՝ հույս հայտնելով, որ ընկերությունը կձեռնարկի բոլոր միջոցառումները՝ առկա թերություններն ու նախկին բացթողումները շտկելու համար:
Այս պահին աշխատակիցների քանակը հասնում է շուրջ 800-ի: Նախատեսվում է նրանց թիվը համալրել ևս 200-ով: Կ. Ղազարյանը մարզի ղեկավարին տեղեկացրեց, որ աշխատակիցների գերակշիռ մասը Շնող և Ալավերդի համայնքի բնակիչներ են:
Ալավերդու պղնձաձուլարանի տնօրինության և աշխատակիցների հետ հանդիպմանը Անդրեյ Ղուկասյանը ներկայացրեց առկա պատկերը, կառավարության կողմից իրականացվող աշխատանքներն ու խնդրի վերջնական կարգավորման հետ կապված պետության դիրքորոշումը:
Նա տեղեկացրեց, որ տնօրենի հետ ձեռք է բերել պայմանավորվածություն աշխատանքից ազատված 206 աշխատակիցներից շուրջ 50-ին աշխատանք առաջարկել Թեղուտի հանքավայրում: Աշխատատեղերի ավելացմանը զուգահեռ գործընթացը հետագայում ևս կշարունակվի:
Տարածքային կառավարման և ենթակառուցվածքների նախարարությունում կայացել է քննարկում «Էյ-Սի-Փի» ընկերության ներկայացուցչի մասնակցությամբ: Հանդիպման արձանագրության համաձայն այս պահին գործարանում շարունակվում է աղացագնդերի արտադրությունը, որում ներգրավված է 60 աշխատակից: Վառարանների հզորացումից հետո նրանց թիվը կհասնի շուրջ 180-ի: Ընկերությունը պարտավորվել է ստանալ արտանետումների համապատասխան թույլտվություն՝ առաջիկա 2-3 շաբաթվա ընթացքում ներկայացնելով անհրաժեշտ փաստաթղթեր:
«Էյ-Սի-Փի» ՓԲԸ-ին առաջարկվել է սեղմ ժամկետներում վերսկսել հնարավոր ներդրողների հետ բանակցությունների ընթացակարգը՝ սեղմ ժամկետներում կառավարությանը ներկայացնելով տեխնոլոգիական հնարավոր լուծումների և ժամկետների մասին տեղեկատվություն: Զուգահեռաբար առաջարկվել է հստակեցնել ՎՏԲ բանկի հետ հետագա համագործակցության հավանականությունը:
Մարզպետն ընդգծեց կառավարության դիրքորոշումը. ունենալ հստակ ծրագիր, որի պարագայում միայն կառավարությունը կտրամադրի արտանետումների հետ կապված արտոնություններ: Կառավարությունը ևս աշխատանքներ է իրականացնում պոտենցիալ ներդրողների ներգրավելու ուղղությամբ:
Լուսինե Մեջլումյանն իր հերթին վստահեցրեց, որ իրենց ջանքերը ևս ուղղված են գործարանը պահպանելուն և իրենք կրկին պատրաստ են հնարավոր ներդրողների հետ վերսկսել բանակցությունները:
Անդրեյ Ղուկասյանը շնորհակալություն հայտնեց ընկերության տնօրենին համագործակցության համար՝ վստահեցնելով, որ գործարանի վերագործարկման հարցում տարբեր կողմեր չկան. «Բոլորիս ջանքերն ուղղված են խնդրի կարգավորմանն ու տարածաշրջանի բնակչությանն աշխատանքով ապահովմանը»:
Մարզպետը աշխատակիցներին հայտնեց ևս մեկ ուրախալի տեղեկություն. այս պահին ձեռք է բերվել բանավոր պայմանավորվածություն աշխատանքից ազատված և վարկ ունեցող բնակիչների բանկային տույժ-տուգանքները ներելու վերաբերյալ: Անդրեյ Ղուկասյանն առաջարկեց ներկայացնել այդ աշխատակիցների ամբողջական ցանկը՝ գործընթացը սկսելու համար: