Լոռու մարզպետի աշխատակազմ

 Լոռու մարզպետ Անդրեյ Ղուկասյանն այսօր մարզպետարանի պատասխանատու պաշտոնյաների ուղեկցությամբ ճանաչողական այցով եղավ Հայաստանի ազգային ագրարային համալսարանի Վանաձորի մասնաճյուղում:
Մասնաճյուղի տնօրեն գ.գ. դոկտոր, պրոֆեսոր Ալեքսանդր Հակոբյանը շրջայցի ընթացքում մարզի ղեկավարին ծանոթացրեց մասնաճյուղի լաբորատոր-լսարանային պայմաններին, բուհի պատմությանն ու ներուժին՝ հանգամանորեն ներկայացնելով տարիների ընթացքում ստեղծված ձեռքբերումները:
Մասնաճյուղն ունի բարեկարգ լաբորատոր-լսարանային պայմաններ, գործում են անասնաբուժական սանիտարական փորձաքննության, սննդի անվտանգության, գեոդեզիայի, գյուղատնտեսական մեքենաների և սարքավորումների, ավտոմոբիլների և տրակտորների, մեքենաների մասերի, ֆիզիկայի և էլեկտրատեխնիկայի, հողերի և ջրերի հետազոտությունների մասնագիտացված լաբորատորիաները, մասնագիտական գրականությամբ հարուստ գրադարանը, ընթերցասրահը, էլեկտրոնային գրադարանը, կոնֆերանս-դահլիճն ու մարզասրահ-խաղասենյակը: Այստեղ ժամանակակից պահանջներին համահունչ ուսումնառություն է կազմակերպվում և ամեն ինչ արվում է առկա ռեսուրսները ուսանողների կարիքներին ու նրանց մասնագիտական աճին ծառայեցնելու նպատակով:
Այցը եզրափակվեց գիտաժողովների դահլիճում, որտեղ նրանք դիտեցին Հայաստանի ազգային ագրարային համալսարանի և Վանաձորի մասնաճյուղի մասին պատմող, ինչպես նաև գյուղատնտեսության ոլորտի մասնագիտությունները լուսաբանող տեսահոլովակներ: Ապա մարզի ղեկավարը հանդիպում ունեցավ նաև բուհի կոլեկտիվի հետ:
Օգտվելով առիթից՝ մարզպետ Անդրեյ Ղուկասյանը շնորհակալություն հայտնեց, Ալեքսանդր Հակոբյանին և աշխատակազմին կարճ ժամանակում նման բարձրակարգ պայմաններ ստեղծելու և բուհը ժամանակակից ուսումնական նյութերով, տեխնոլոգիաներով հագեցնելու ու այդ ամենը աչքի լուսի պես պահպանելու համար:
-Գյուղատնտեսությունը մեր մարզի զարգացման գերակա ուղղություներից մեկն է, հետևաբար մեզ համար շատ կարևոր է, որպեսզի ոլորտի զարգացման գործում ներգրավված լինեն հմուտ և բանիմաց մասնագետներ, ովքեր արհեստավարժ կերպով տիրապետում են արդի տեխնոլոգիաներին: Այսօր գյուղատնտեսության զարգացման առաջին պայմաններից է բանիմաց մասնագետներ պատրաստելը: Բուհի Վանաձորի մասնաճյուղի առկայությունն այս առումով շատ կարևոր է մարզի գյուղատնտեսության զարգացման համար,-ասաց մարզի ղեկավարը:
Նա պատրաստակամություն հայտնեղ աջակցել բուհին՝ առավել մեծ ճանաչելիություն ձեռք բերելու և որակյալ կադրեր պատրաստելու հարցում:
Ա. Հակոբյանն իր հերթին շնորհակալություն հայտնեց հրավերը չմերժելու և ջանացավ վերաբերմունք ցուցաբերելու համար: Հանդիպման ավարտին մասնաճյուղի տնօրենը մարզի ղեկավարին նվիրեց իր հեղինակած գիրքը՝ հրավիրելով հաճախակի հյուրըկալվել բուհում: